Vazirlar Mahkamasining 2021-yil 19-noyabrdagi 696-son qarori bilan “Taʼlim tashkilotlari bitiruvchilari baholarining o‘rtacha ko‘rsatkichini hisoblash va uni oliy taʼlim tashkilotlariga kirish imtihonlarida inobatga olish tartibi to‘g‘risida”gi nizom tasdiqlandi.

Unga ko‘ra, majburiy 11 yillik ta’limning so‘nggi 6 yillik baholari o‘rtacha ko‘rsatkichi oliy ta’lim tashkilotlariga kirish imtihonlarida inobatga olinadi.

Baholar ta’lim tashkilotlarining elektron platformalari orqali hisoblanadi va Davlat test markazining “ABITUR” dasturiga uzatiladi.

Baholarning o‘rtacha ko‘rsatgichi 6-11-sinflardagi yoki 6-9-sinflar va 1-2-bosqichlardagi yillik baholarning umumiy yig‘indisini o‘qitilgan fanlarga bo‘lish orqali hisoblanadi.

Baholash tizimidagi maksimal ball 100 foiz deb olinadi va ballar baho tizimiga quyidagicha konvertatsiya qilinadi:

• 86-100% uchun – 5 baho;
• 71-85% – 4 baho;
• 56-70% – 3 baho;
• 56% gacha – 2 baho.

Mazkur tartib 2022-2023-o‘quv yilidan amaliyotga joriy etiladi.

Davlat test markazi matbuot xizmati