Ministrler Kabinetiniń 2022-jıl 16-fevraldaǵı 73-sanlı qararı menen “Shet tilin biliw dárejesin anıqlaw boyınsha mámleketlik xızmetler kórsetiwdiń hákimshilik reglamenti» tastıyıqlandı.

Oǵan bola, 2022-jıl 1-marttan baslap:

• shet tilin biliw dárejesin anıqlaw, qánigelik sertifikatı yamasa maǵlıwmatnama alıw, test sınaǵında qatnasıw boyınsha múrájátler YIDXP (my.gov.uz) arqalı qabıl qılınadı;
• talabannan 3,5 x 4,5 sm ólshemdegi fotosúwret hám mámleketlik xızmet ushın tólemdi tastıyıqlawshı hújjet nusqasın talap etiw biykar etiledi;
• imtixan ótkeriletuǵın kúnler Mámleketlik test orayınıń rásmiy veb saytında daǵaza etiledi hám talabanǵa imtixan kúnin erkin tańlaw huqıqı beriledi;
• test nátiyjelerin daǵaza qılıw múddeti 3 hápteden 1 háptege shekem qısqarttırıladı;
• qánigelik sertifikat yamasa maǵlıwmatnama YIDXP arqalı nátiyje daǵaza etilgen kúnnen baslap 1 jumıs kúni dawamında talabanǵa jiberiledi.

Ámeldegi hár bir dáreje (A2,B1, B2, C1) ushın óz aldına imtixan tapsırıw tártibine qosımsha túrde ulıwmalastırılǵan kóp dárejeli (Multi-level) test sisteması (B1, B2, C1) engizildi.

Kóp dárejeli test sisteması 2022-jıl 1-marttan – inglis tili ushın, 2022-jıl 1-noyabrden – nemis, francuz hám arab tilleri ushın engiziledi.

Talabanlar qánigelik imtixandı ótkeriw ornı hám anıq waqtı haqqında imtixan sánesinen 3 kún aldın xabardar etiledi.

Shet tilin biliw dárejesi test sınaǵı, jazba jumıs hám sóylew kónlikpesin bahalaw jolı menen anıqlanadı hám bul tıńlap túsiniw, oqıw, jazba jumıs hám sóylew bólimlerinen ibarat boladı.

Reglament 2022-jıl 1-marttan kúshke kiredi.