Avvalroq aprel oyida o‘tkaziladigan chet tilini bilish va egallash darajasini aniqlash test sinovlari 2021-yilning 1-yarim yilligi uchun so‘nggisi bo‘lib, mazkur imtihonlar 2021-2022-o‘quv yili uchun oliy ta’lim muassasalarining bakalavriat ta’lim yo‘nalishlariga kirish test sinovlaridan so‘ng davom ettirilishi haqida xabar bergan edik.

Ko‘plab talabgorlarning murojaatlariga binoan chet tilini bilish va egallash darajasini baholash imtihonlarini may oyida ham tashkil etish belgilandi.

Bunda imtihonlar barcha tillardan B2 tilni bilish darajasi bo‘yicha o‘tkaziladi.

Talabgorlarni ro‘yxatga olish my.dtm.uz sayti orqali 7-mayga qadar davom etadi.

Hujjatlar esa 3-maydan 7-mayga qadar qabul qilinadi.

Ro‘yxatdan o‘tish vaqtida talabgorlar imtihon topshirish hududi sifatida Qoraqalpog‘iston Respublikasi, viloyatlar va Toshkent shahridan birini tanlab, o‘zlari tanlagan hududda test sinovlarida ishtirok etishlari mumkin.

Ro‘yxatdan o‘tish bo‘yicha yo‘riqnoma bilan bu yerda tanishish mumkin.

Davlat test markazi matbuot xizmati