2022-yil 26-sentabr kuni Davlat test markazida Niderlandiyaning “Cito International” tashkiloti bilan hamkorlik aloqalarini yo‘lga qo‘yish bo‘yicha uchrashuv bo‘lib o‘tdi.

Unda Davlat test markazi direktori Madjit Karimov, direktor o‘rinbosarlari Sardor Radjabov, Sherzod Batirov, boshqarma boshliqlari Javlonbek Nurmatov, Zafarbek Olimbekov, bosh mutaxassis Nasimbek Lutfiyev hamda “Cito International” tashkiloti rahbari Melhio de Vries ishtirok etdi.

Uchrashuvda har ikki tomon rahbarlari baholash sohasida tajriba almashish va hamkorlik aloqalarini yanada mustahkamlash masalalarini muhokama qildilar hamda ikki tashkilot o‘rtasida Memorandum imzolandi.

Davlat test markazi direktori va “Cito International” tashkiloti rahbari Memorandum imzolash orqali muhim sohalarda hamkorlik qilishga kelishib oldilar.

Memorandumda faoliyat yo‘nalishlaridan kelib chiqqan holda test sinovlarini rivojlantirish, baholovchilarning malakasini oshirish, baholash mezonlarini takomillashtirish, test sinovlarida axborot texnologiyalari infrastrukturasi va ma’lumotlar xavfsizligi hamda boshqa muhim jihatlar ustida amaliy ishlar olib borish ko‘zda tutilgan.

Davlat test markazi axborot xizmati