2019-yil 17-sentabr kuni Davlat test markazida umumiy yig‘ilish bo‘lib o‘tdi. Yig‘ilishda O‘zbekiston Respublikasi Bosh vazirining o‘rinbosari Abduxakimov Aziz Abdukaxarovich, lavozimga yangi tayinlangan Botirov Sherzod Negmuratovich, DTM rahbariyati va mehnat jamoasi ishtirok etdilar. Unda A.A.Abduxakimovning joriy yil o‘tkazilgan test sinovlarining tashkiliy-mazmuniy shakllari, yutuq va kamchiliklari, takomillashtirish tamoyillari, faoliyatni yuqori saviya va salohiyat asosida tashkil etishda imkoniyat darajalari, davlatimizning sohada ko‘zlangan maqsadining mohiyati yuzasidan qiziqarli fikr-mulohazalari va munosabati eshitildi.

Yig‘ilish yakunida Davlat test markazi direktoriga yana bir  o‘rinbosar tayinlanganligi e’lon qilindi va Vazirlar Mahkamasining tayinlash to‘g‘risida 2019-yil 13-sentyabrdagi 768-son qarori o‘qib eshittirildi.  Shuningdek, Davlat test markazining shtatlar tuzilmasida vakant joyga Vazirlar Mahkamasi qaroriga ko‘ra direktor o‘rinbosari lavozimiga tayinlangan Botirov Sherzod Negmuratovich jamoaga tanishtirildi.

Sh.N.Botirov o‘z chiqishida jamoa bilan test sinovlarini yanada yuqori saviyada o‘tkazish, aniqlangan kamchiliklarni bartaraf etish, sohani rivojlantirish yo‘lida bor kuch va imkoniyatini sarflashini bildirdi. Rahbariyatning yangi a’zosi boshqarma va bo‘limlar bilan tanishib chiqdi.

O‘z navbatida, Davlat test markazi yuksak salohiyatli kadrlar tayyorlash, soha va tarmoqlarni bilimli mutaxassislar bilan ta’minlash ishlarida Sh.N.Botirovga katta muvaffaqiyatlar tilaydi.

Davlat test markazi ma’muriyati