O‘zbekiston Respublikasi Vazirlar Mahkamasining 2019 yil 9 iyul kuni “Oliy ta'lim muassasalariga test sinovlari orqali qabul qilish tizimi takomillashtirilishi munosabati bilan O‘zbekiston Respublikasi Vazirlar Mahkamasi huzuridagi Davlat test markazining faoliyatini kuchaytirish to‘g‘risida” 572-son qarori qabul qilindi.

Mazkur qaror O‘zbekiston Respublikasi Prezidentining “2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid davlat davlat dasturi to‘g‘risida” 2019 yil 17 yanvardagi PQ–5635-son Farmoni hamda “Oliy ta'lim muassasalariga test sinovlari orqali qabul qilish tizimini takomillashtirish bo‘yicha qo‘shimcha chora-tadbirlar to‘g‘risida” 2019 yil 14 maydagi PQ–4319-son qarorida belgilangan vazifalar ijrosini sifatli ta'minlash, oliy ta'lim muassasalariga qabul jarayonini takomillashtirish hamda Davlat test markazi faoliyatini kuchaytirish masalalarini o‘z ichiga oladi.

572-son qaror asosida Davlat test markazi xodimlarining umumiy cheklanlangan soni 186 nafardan iborat yangi tuzilmasi tasdiqlandi. Shuningdek, Vazirlar Mahkamasining 2017 yil 20 iyundagi 393 va 2018 yil 3 apreldagi 261-son qarorlari hamda idoraviy me'yoriy-hujjatlar ushbu qarorga muvofiqlashtirildi. 

Test sinovi orqali qabul tizimini rivojlantirish bo‘yicha qabul qilingan hukumat qarorlari asosida kiritilgan barcha o‘zgarish, yangiliklar, yoshlarimiz uchun yaratilgan imtiyoz va imkoniyatlarni hayotga tatbiq etish, shuningdek, test sinovi jarayonlarida shaffoflik, adolatlilikni ta'minlash uchun Davlat test markazi barcha imkoniyatlarini ishga soladi. 

Yoshlarimizning hayotda munosib o‘rin topishlari, ularga xalqaro talablarga muvofiq bilim berish, jahon va milliy qadriyatlar asosida yuksak salohiyatli shaxs sifatida kamol topishini birlamchi vazifa deb bilgan hukumatimizning bunday muhim qarorlari nafaqat Davlat test markazi, balki oldiga ulkan maqsadlarni qo‘ygan yoshlar hayotida ham dasturamal bo‘lishi shubhasiz.