Ma’lumki, bundan 3-4 yil oliy ta’lim muassasalarining bakalavriat ta’lim yo‘nalishlariga kirish uchun hujjat topshirish juda murakkab jarayon edi. Jumladan:

• Abituriyentlar hujjat topshirish uchun oliy ta’lim muassasasi qayerda joylashgan bo‘lsa, shu yerga kelib hujjat topshirishi kerak edi. Misol uchun, Navoiy viloyatida yashovchi abituruyent O‘zbekiston milliy universitetiga hujjat topshirmoqchi bo‘lsa, albatta Toshkent shahriga kelishi kerak edi.
• Har bir abituriyent ko‘plab hujjatlar (086-shakldagi tibbiy ma’lumotnoma, pasport nusxasi, diplom yoki attestatning asli va nusxasi, rasm, konvert va boshqalar)ni yig‘ishi va hujjat topshirish vaqtida oliy ta’lim muassasalaridagi qabul komissiyalariga taqdim etishi kerak edi.
• Mazkur hujjatlarni yig‘ishni o‘ziga taxminan 1 hafta vaqt sarflar edi.
• Ayrim hollarda abituriyent hujjatlarini topshirish uchun kelganida hujjatlarida kamchilik borligi uchun yana o‘zi yashaydigan hududga qaytib borib, kamchiliklarni tuzatib, yana oliy ta’lim muassasasiga hujjat topshirish uchun kelishlariga to‘g‘ri kelar edi.
• Hujjat topshirish vaqtida uzundan uzun navbatlar yuzaga kelar edi.
• Hujjatlarni topshirishdan tashqari, test sinovi uchun ruxsatnoma olish, test sinovida ishtirok etish va test natijalarini bilish uchun ham oliy ta’lim muassasasiga kelish talab etilar edi.

Hozirgi kunda esa abituriyentlar uyida o‘tirgan holda kompyuter yoki telefonda Davlat test markazining rasmiy veb-sayti (my.dtm.uz) orqali onlayn ro‘yxatdan o‘tishlari mumkin. Bunda ulardan hech qanday ortiqcha hujjat talab etilmaydi. Faqatgina pasport va shahodatnoma ma’lumotlarini dasturga kiritish yetarli.

Mazkur jarayonni oldingi va hozirgi holatini aks ettirgan holda videorolik (reklama roligi) tayyorlash lozim.

Bunda oldingi murakkab jarayonni https://youtu.be/vKqWmfKgWhc videodagi kabi usulda aks ettirish kerak. Videoning asosiy qismida oldingi murakkab jarayon aks ettirilsa, video yakunida hozirgi juda ham qulay bo‘lgan jarayon ko‘rsatiladi.

Tayyorlanadigan videorolik (reklama roligi) 1 minutdan oshmasligi va sifati yuqori bo‘lishi hamda yoshlar orasida keng tarqaladigan, trendga aylana oladigan videorolik bo‘lishi lozim.

Yuborilgan takliflar bilan birga, taklif yuborgan firmalarning faoliyati va ular tomonidan tayyorlangan videolar ham o‘rganib chiqiladi va eng yaxshi taklif yuborgan, xizmat sifati yuqori bo‘lgan firma tanlab olinadi.