O‘zbekiston Respublikasi Prezidentining 2012-yil 10-dekabrdagi PQ – 1875-son Qaroriga muvofiq 2013–2019-yillarda “Chet tilini bilish va egallash darajasini baholash boshqarmasi” tomonidan olib borilgan ishlar va Vazirlar Mahkamasining 2019-yil 13-maydagi 395-son qaroriga asosan milliy va xalqaro sertifikatlarning joriy etilishiga bag‘ishlangan matbuot anjumani o‘tkazildi.

Anjuman 2019-yilning 25-iyul kuni O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida tashkil etildi. Unda boshqarma boshlig‘i Radjabov Sardor Baxtiyorovich, bo‘lim boshliqlari Uraeva Elvira Usmanovna, Azizov Xusan Xabibullaevichlar ishtirok etdilar.

Tadbir davomida “Chet tilini bilish va egallash darajasini baholash boshqarmasi” tomonidan o‘tkazilgan test sinovlari, shuningdek, abituriyentlar va pedagog xodimlar uchun chet tillaridan malaka sertifikati berish bo‘yicha olib borilgan tahlillar, bu yo‘lda xalqaro hamkorlik, chet tilini bilish va egallash darajasini aniqlash hamda davlat namunasidagi malaka sertifikat berish, chet tillari bo‘yicha olingan sertifikatlar pedagog kadrlarga moddiy rag‘bat bo‘yicha yaxshi imkoniyat berishi, abituriyentlarga sertifikat olgan chet tili fanidan test sinovlari jarayonida test topshirmagan holda maksimal ball berilishining huquqiy asoslari, bu borada amalga oshirilgan ishlar va kelgusi rejalar bo‘yicha ma'lumotlar taqdim etildi.

Tele va radiokanallar, bosma va elektron ommaviy axborot vositalari vakillari, blogerlarning savollariga batafsil javob berildi. Matbuot anjumani qizg‘in musohaba ruhida o‘tdi.

Axborot xizmati