Joriy yilning 6-dekabr kuni Britaniya Kengashining O‘zbekistondagi vakolatxonasi vakillari bilan Davlat test markazi rahbariyati o‘rtasida uchrashuv bo‘lib o‘tdi.

Uchrashuvda Britaniya Kengashi tomonidan Britaniya Kengashining O‘zbekistondagi vakolatxonasi direktori o‘rinbosari J.Gulyamova hamda biznesni rivojlantirish menejeri A.Sadikov ishtirok etdilar.

Davlat test markazi tomonidan Davlat test markazi direktori M.Karimov, direktor o‘rinbosari K.Xakberdiyev, boshqarma boshlig‘i S.Radjabov hamda yuridik byuro boshlig‘i G.Madraximova qatnashdilar.

Uchrashuv davomida hamkorlikni yanada rivojlantirish, mavjud loyihalarni amalga oshirishdagi muammolar hamda Davlat test markazi tomonidan 2020-yil 5-7-may kunlari tashkil etilishi rejalashtirilgan xalqaro konferensiya to‘g‘risida ikki tashkilot fikr va mulohazalari tinglandi.

Britaniya Kengashining O‘zbekistondagi vakolatxonasi direktori o‘rinbosari J.Gulyamova «APTIS for teachers» testlarini hamkorlikda o‘tkazish uchun olib borilayotgan ishlar va mavjud muammolar yechimi to‘g‘risida ma’lumotlar berib o‘tdi hamda xalqaro konferensiyada qatnashish uchun dunyoning oldi mutaxassislarini jalb qilish rejalari to‘g‘risida o‘rtoqlashdi.

Davlat test markazi direktori ham o‘z o‘rnida «APTIS for teachers» testlarini hamkorlikda o‘tkazish uchun hozirgi kungacha qilingan ishlar to‘g‘risida ma’lumot berib o‘tdi. Xalqaro konferensiyada Britaniya Kengashining o‘rni katta bo‘lishini va ularning tajribasidan foydalanish kerakligini ta’kidladi.

Uchrashuvda xalqaro konferensiyani tashkil etish va o‘tkazish bo‘yicha guruhga Yevropaning yetakchi mutaxassislaridan biri Viktoriya Klarkni qo‘shish taklifi ikki tomondan ham qo‘llab quvvatlandi.

Uchrashuv ko‘tarinki ruhda o‘tdi hamda ikki tashkilot hamkorligida yana bir yangi davr boshlanishiga yangi qadam bo‘ldi desak hech mubolag‘a bo‘lmaydi.

Davlat test markazi matbuot xizmati