2021-yil 2-dekabr kuni “8-dekabr – O‘zbekiston Respublikasi Konstitutsiyasi qabul qilingan kun” hamda “9-dekabr – Xalqaro korrupsiyaga qarshi kurashish kuni” munosabati bilan Davlat test markazida ochiq davra suhbati bo‘lib o‘tdi.

Ochiq davra suhbatida O‘zbekiston Respublikasi Korrupsiyaga qarshi kurashish agentligi mas’ul xodimi Ravshan Yuldashev va Toshkent davlat yuridik universitetidan yuridik fanlar doktori, professor Niyozova Salomat Saparovna hamda Davlat test markazi rahbariyati va jamoasi ishtirok etdi.

Tadbirning “Korrupsiya-rivojlanishimizga to‘siq” mavzuida o‘tgan qismi doirasida sohaga oid O‘zbekiston Respublikasi Qonunlari, O‘zbekiston Respublikasi Prezidentining qaror va farmonlarida belgilangan dolzarb vazifalarning amalga oshirilish holati, qilinishi kerak bo‘lgan ishlar va ularning huquqiy asoslarini yaratish kabi global muammoga qarshi kurashning amaliy harakatlari to‘g‘risida batafsil gapirib o‘tildi. Shuningdek, misollar asosida korrupsiya belgilari, tasnifi, uning oldini olishda eng muhim qurol – bu faoliyatning to‘la ochiqligi, shaffoflik va adolatni ta’minlash hamda bu sohada yakdil kurash har bir fuqaroning burchi ekanligi aytib o‘tildi.

Shu bilan birga, konstitutsiyamiz qabul qilinganligining 29 yilligi hamda ulug‘ sana bilan bog‘liq fakt va dalillar, siyosiy tafakkurning nodir namunasi, Vatanimiz mustaqilligi, tinchligi va osoyishtaligi, xalqimizning huquq va erkinliklari, manfaatlari kafolati hamda huquqiy ong va madaniyatni yuksaltirish ijtimoiy zururat ekanligi, korrupsiyaga qarshi kurashda jamoatchilikning roli to‘g‘risida ma’ruzalar o‘qildi, videorolik va prezentatsiyalar namoyish etildi.

Tadbir jonli musohaba ruhida va qizg‘in savol-javob tarzida o‘tdi.

Davlat test markazi matbuot xizmati