Abituriyentlarga qulaylik yaratish maqsadida fizika fanidan 2020-2021-o‘quv yilidan boshlab oliy ta’lim muassasalarining bakalavriatiga qabul test sinovlarida foydalaniladigan “Doimiy fizik kattaliklar va shartli belgilashlar jadvali” ishlab chiqildi.

“Doimiy fizik kattaliklar va shartli belgilashlar jadvali” fizika fanidan test topshiruvchi abituriyentlarga kimyo fanidan test topshiruvchi abituriyentlarga D.I.Mendeleyevning kimyoviy elementlar davriy jadvali berilgani kabi A5 formatda taqdim etish rejalashtirilmoqda. Jadvaldan test topshiriqlarida eng ko‘p foydalaniladigan karrali va ulushli o‘lcham birliklarini hosil qilish uchun qo‘llaniladigan o‘nli ko‘paytuvchilar, shuningdek, ularning nomlari va belgilarini hosil qiluvchi old qo‘shimchalar, doimiy fizik kattaliklar, moddalarning zichliklari, solishtirma issiqlik sig‘imlari, suyuqliklarning sirt taranglik koeffitsiyentlari, ba’zi elementlarning hamda murakkab moddalarning molyar massalari va boshqa kattaliklar o‘rin olgan.

Ushbu tavsiya qilinayotgan jadvalning abituriyentlarga tarqatma material ko‘rinishida berilishi quyidagi afzalliklarga ega:

• Berilgan test topshirig‘ini to‘liq yechish uchun zarur bo‘lgan kerakli ma’lumotlarni abituriyentlardan o‘z bilimiga tayangan holda aniqlashni talab qiladi.
• Abituriyentlarni DTS da nazarda tutilmagan ma’lumotlarni yodlashga majbur qilmaydi.
• Test topshiriqlarining ko‘rinishini  sifat jihatdan yaxshilaydi va qisqa shaklda berilishini ta’minlaydi.

“Doimiy fizik kattaliklar va shartli belgilashlar jadvali” quyidagi pdf fayllarda keltirilgan:

Doimiy fizik kattaliklar va shartli belgilashlar jadvali (o‘zbekcha)

Doimiy fizik kattaliklar va shartli belgilashlar jadvali (ruscha)

Davlat test markazi matbuot xizmati