Davlat test markazi tomonidan abituriyentlarning fikrini bilish maqsadida Davlat test markazining rasmiy telegram kanalida e-DTM tizimi bo‘yicha so‘rovnoma o‘tkazilgan edi.

Mazkur so‘rovnomada ko‘pchilik tomonidan test topshiriqlariga har bir fan bo‘yicha alohida buyurtma berish o‘rniga 5 ta fan bo‘yicha bitta kitob holida buyurtma berish qulay ekanligi ma’lum qilindi.

Shu sababli abituriyentlarga qulaylik yaratish maqsadida e-DTM tizimi (@e_dtm_bot telegram boti) takomillashtirilib, test topshiriqlariga buyurtma berish yanada osonlashtirildi.

Endilikda abituriyentlar @e_dtm_bot telegram boti orqali 1- va 2-mutaxassislik fanlarini tanlagan holda 2 ta mutaxassislik fani va 3 ta majburiy fan bo‘yicha test topshiriqlarini yagona kitob holida buyurtma qilishlari mumkin.

Bunda bir vaqtning o‘zida bir nechta test topshiriqlari kitobiga buyurtma berish imkoniyati mavjud.

Natijalarni esa mazkur bot orqali onlayn tarzda shu zahotiyoq bilib olish mumkin.

Davlat test markazi axborot xizmati