Jurnalist uchun tor doira va umumiy soha bo‘yicha (bir mavzu doirasida) yozaverish azobning o‘zginasi, serqirralik yo‘qoladi. Ammo hozir yana eski mavzu – ijtimoiy tarmoqlarda bosilayotgan asossiz fikr-mulohazalarga qaytmoqchimiz. Avval ham yozilganidek, ijtimoiy tarmoqlarda yana Davlat test markazining natija hisoblaydigan qimmatbaho texnika vositalari xato bilan ishlayapti, degan ma’lumotlar uchramoqda.

Shu o‘rinda qayta ta’kidlamoqchimiz: hurmatli abituriyentlar va ota-onalar, AQShning SCANTRON korporatsiyasi tomonidan ishlab chiqarilgan iNSIGHT™ 150 qurilmalari dunyoda eng yetakchi texnik vositalardan hisoblanadi va ulardan juda ko‘p mamlakatlar foydalanadi. Sizlarni ishontirib aytamizki, Davlat test markazida o‘rnatilgan yuqori tezlikda ishlovchi iNSIGHT™ 150 markali optik skaner standartga mos, soz holatda va xatosiz ishlamoqda. Ijtimoiy tarmoqlarda berilayotgan ma’lumotlarga ishonib qolmasdan, holat bo‘yicha avval Davlat test markaziga murojaat qilinsa, aniq javob olinsa, maqsadga muvofiq bo‘lardi. Blogerlarning jamoatchilikka tezkor xabar yetkazish tamoyillariga sodiqligidan xursandmiz, lekin ular orasida o‘quvchilarini bir onda ko‘paytirishga harakat qilayotgan, buni nosog‘lom fikrlar, asossiz ma’lumotlar tarqatish, umuman “sensatsiya” evaziga amalga oshirayotganlari ham uchrayotganligini unutmaslik kerak.

Jamoatchilikning, blogerlarning tezkor ma’lumotlarni qabul qilishdan avval uni “xom” yoki “yetilgan”ligini tahlil qilishida ma’naviy-siyosiy yetukligiga ishonib qolamiz.

Davlat test markazi