2020-yil 6-yanvar kuni Davlat test markazida O‘zbekiston Respublikasi ta’lim muassasalariga o‘qishga qabul qilish uchun o‘tkaziladigan test sinovlarida qo‘llashga tavsiya etiladigan umumta’lim fanlariga doir test topshiriqlarini takomillashtirish bo‘yicha yig‘ma ishchi guruh va umumta’lim fanlari bo‘yicha ekspertlar yig‘ilishi bo‘lib o‘tdi. Mazkur tadbir O‘zbekiston Respublikasi ta’lim muassasalariga o‘qishga qabul qilish bo‘yicha Davlat komissiyasining 2019-yil19-dekabrdagi majlisi qarori ijrosini ta’minlash maqsadida tashkil etildi.

Yig‘ilishda Davlat komissiyasi qarori bilan ro‘yxati tasdiqlangan xalq ta’limi, oliy ta’lim, o‘rta maxsus ta’limi tizimidagi malakali mutaxassislar ishtirok etdilar. Unda asosan test topshiriqlari bazasini shakllantirishga oid masalalar ko‘rib chiqildi hamda ekspertlar oldiga qo‘yilgan muhim vazifalar belgilab olindi. Xususan, test topshiriqlarini shakllantirishda umumta’lim fanlari o‘quv dasturlari bo‘limlarining to‘liq qamrab olinishiga, test topshiriqlari sifatini oshirishga, shuningdek, ularning tillar kesimida (o‘zbek, qoraqalpoq, rus tilida) mazmunan bir xil bo‘lishini ta’minlashga alohida e’tibor qaratildi.

Davlat test markazi matbuot xizmati