2021-yilning 1-yarmi davomida sayyor qabullar o‘tkazish rejasiga muvofiq Davlat test markazi rahbariyati tomonidan Markaz faoliyatiga oid masalalar yuzasidan jismoniy va yuridik shaxslarning murojaatlarini ko‘rib chiqish maqsadida sayyor qabullar tashkil etish davom etmoqda.

Reja doirasida 2021-yil 24-25-mart kunlari Davlat test markazi direktori Karimov Madjit Malikovich rahbarligida Davlat test markazining Farg‘ona viloyatidagi bo‘limi xodimlari tomonidan sayyor qabullar o‘tkazildi.

Dastlabki sayyor qabul 24-mart kuni Marg‘ilon shahridagi “Xo‘ja forso” mahalla fuqarolar yig‘inida joylashgan 10-umumta’lim maktabida 120 nafardan ortiq o‘quvchilar, fan o‘qituvchilari hamda mahalla faollari ishtirokida bo‘lib o‘tdi. Mazkur sayyor qabul Marg‘ilon shahar hokimi A.Ziyovutdinov, Farg‘ona viloyati xalq ta’limi boshqarmasi boshliq o‘rinbosari Sh.Dolimov, Marg‘ilon shahar xalq ta’limi bo‘limi mudir o‘rinbosari F.Madraximov hamda Xalq deputatlari kengashi Marg‘ilon shahar kengashi deputati M.Mirzayevlar bilan hamkorlikda o‘tkazildi.

Shuningdek, shu kunning o‘zida O‘zbekiston Respublikasi Prezidentining Farg‘ona viloyatidagi Xalq qabulxonasi mutaxassislari bilan hamkorlikda Farg‘ona shahrida joylashgan Prezident xalq qabulxonasida ham sayyor qabul tashkil etildi.

Keyingi sayyor qabullar 25-mart kuni Uchko‘prik tumanidagi “Toshkentliguzar” mahalla fuqarolar yig‘inida joylashgan 18-umumta’lim maktabi va “Uchko‘prik” mahalla fuqarolar yig‘inida joylashgan Musiqa va san’at maktabida Uchko‘prik tuman hokimining o‘rinbosari Sh.Pozilov, Uychi tumani xalq ta’limi bo‘limi mudirasi D.Ayupova hamda Farg‘ona viloyati xalq ta’limi boshqarmasi boshliq o‘rinbosari Sh.Dolimov bilan hamkorlikda bo‘lib o‘tdi. Unda 320 nafardan ortiq fuqaro – yoshlar, bitiruvchi o‘quvchilar, o‘qituvchilar va ota-onalar ishtirok etdi.

Yoshlar, bitiruvchi o‘quvchilar, o‘qituvchilar, ota-onalar, mahalla faollari va mas’ul shaxslar ishtirokida bo‘lib o‘tgan ushbu tabdirlar ochiq muloqot shaklida o‘tkazildi hamda oliy ta’lim muassasalariga kirish test sinovlariga oid eng so‘nggi yangiliklar, kutilayotgan o‘zgarishlar, test sinovi jarayonlarini soddalashtirish, test topshiruvchilar uchun yanada kengroq imkoniyat, qulayliklarga asoslangan shart-sharoitlar yaratish, mantiqiy fikrlashga yo‘naltirilgan test topshiriqlarini shakllantirish va umumta’lim fanlaridan milliy test tizimini joriy etish, shuningdek, sohaga oid qaror va farmonlarning mazmun-mohiyatiga bag‘ishlandi.

Tadbirlar davomida katta qiziqish bilan qatnashgan o‘quvchilar, o‘qituvchilar, ota-onalar, mas’ul shaxslar va boshqalarning savollariga batafsil javob berildi.

Davlat test markazi matbuot xizmati