Joriy yil 02-oktabr kuni daryo.uz va bong.uz internet nashrlarida "Foto: Farg‘onadagi maktabda 1-sinf o‘quvchilariga polda dars o‘tilmoqda. Partalarni DTM olib ketgan" nomli maqola e’lon qilindi (https://daryo.uz/k/2019/10/02/fargonada-davlat-test-markazi-partalarni-olib-qoygani-sabab-maktabning-1-sinf-oquvchilari-polda-otirib-talim-olmoqda-foto/), (https://bong.uz/zhamiyat/710-710).

Maqolada “Farg‘ona shahridagi 24-sonli umumta’lim maktabining 1-sinf o‘quvchilari partalari yo‘q sinfda, polda o‘tirib dars o‘tilayotgani”, “Davlat test markazi partalarni olib ketgani sabab bolalar shu ahvolda ta’lim olishga majbur bo‘lmoqda” yoki “partalar Davlat test markaziniki bo‘lganligi sabab maktabdagidar hech nima qila olishmaydi” kabi jamoatchilik fikrini buzishga, o‘zgartirishga qaratilgan iboralarni o‘qish mumkin. Bu amaldagi normativ-huquqiy hujjatlardan umuman bexabar (yoki xabardoru, atayin shunday yo‘l tutgan), bir tomonlama noxolis yoritilgan, haqiqatga zid xulosa qilish uslub va shakllarni yoqtiruvchi jurnalist tomonidan e’lon qilinganligi ko‘rinib turibdi. Agar o‘zini hurmat qilgan jurnalist tahririyatga kelgan xabarni e’lon qilishdan oldin uning haqiqatligiga ishonch hosil qilish uchun jurnalistlik burchini bajarganida yoki Davlat test markazida partalar umuman yo‘qligi, bo‘lmaganligini bilganida yoxud hech bo‘lmasa, Davlat test markazidan bog‘lanib so‘raganida, bunday tuhmat xabar dunyo yuzini ko‘rmasdi.

Keling, asl holatni ko‘rib chiqaylik.

Haqiqatan ham O‘zbekiston Respublikasi Bosh vaziri o‘rinbosarining 2019-yil 26-sentabrdagi 14/1–2100 raqamli yozma ko‘rsatmasiga muvofiq joriy yilning 3-4 oktabr kunlari Qo‘qon universitetiga kirish test sinovlari o‘tkazilishi belgilangan.

Shuningdek, ko‘rsatmada Farg‘ona viloyati hokimligi, Sog‘liqni saqlash vazirligi, Ichki ishlar vazirligi, Milliy gvardiya va Axborot texnologiyalari va kommunikasiyalarini rivojlantirish vazirligiga “Test sinovlari o‘tkaziladigan binolarni yetarli miqdorda bir o‘rinlik stol va stullar, zarur texnika vositalari bilan jihozlash, ota-onalar kutish joylarini tayyorlash, maishiy va tibbiy shart-sharoitlar yaratish hamda nazorat xizmati postlarini tashkil etish ta’minlansin”, kabi vazifalar yuklatilgan, Davlat test markaziga emas. Amaldagi tartib ham shunday. 

Davlat test markazi joylarda mahalliy tashkilotlar tomonidan tayyorlangan binolarda test sinovi o‘tkazadi, binolarni parta bilan ta’minlash vazifasi bilan shug‘ullanmaydi. Buni hamma bilish shart, ayniqsa jurnalistlar.