Vazirlar Mahkamasining 2012-yil 10-iyuldagi 203-son qarori, Qurolli Kuchlar Akademiyasining 2019-yil 24-iyundagi 1748-son hamda “Toshkent shahridagi Puchon universiteti” nodavlat ta'lim muassasasining 2019-yil 8-iyuldagi 80-son xat orqali murojaatiga muvofiq 18-iyul kuni O‘zbekiston Respublikasi Qurolli Kuchlar Akademiyasining Harbiy xavfsizlik va Davlat mudofaasi fakulteti (97 nafar nomzod), Toshkent tibbiyot akademiyasi huzuridagi Harbiy-tibbiyot fakulteti (21 nafar nomzod), Janubiy Koreyaning Puchon universiteti O‘zbekiston filialiga (743 nafar nomzod) qabul test sinovlari bo‘lib o‘tdi.

Test sinovlari 2 smenada, videokuzatuv vositalari bilan jihozlangan katta sig‘imli binolarda o‘tkazildi.

Test sinovlarida ishtirok etishi belgilangan jami 861 nafar nomzoddan 58 nafari qatnashmadi, test topshirish tartib-qoidalarini buzganligi sababli, 2 nafar abituriyent test sinovlaridan chetlatildi.

Test materiallari barcha hududlardan o‘z vaqtida Davlat test markaziga yetkazib kelindi.

Ayni paytda yopiq va maxfiy rejimda natijalarni hisoblash ishlari olib borilmoqda.

Axborot xizmati