2022-yil 28-iyun kuni O‘zbekiston Respublikasi Vazirlar Mahkamasi huzuridagi Davlat test markazi Hay’atining navbatdagi yig‘ilishi bo‘lib o‘tdi. Unda Vazirlar Mahkamasining mas’ul xodimi Sh.X. Daliyev, hay’at a’zolari va masalalari kiritilgan 6 ta viloyat bo‘limlari boshliqlari ishtirok etdilar.

Mazkur yig‘ilishda abituriyentlarni oliy ta’lim muassasalariga test sinovlari orqali qabul qilish tizimini takomillashtirish bo‘yicha amalga oshirilgan ishlar, tayyorgarlik holati, Davlat test markazining Farg‘ona, Namangan, Andijon, Surxondaryo, Qashqadaryo va Toshkent viloyatlari bo‘limlarining ijro intizomi holati, 2-chorak davomida jismoniy va yuridik shaxslarning murojaatlari bilan ishlash samaradorligi kabi kun tartibidan o‘rin olgan masalalar bo‘yicha olib borilgan tahlillar va ishlar sur’ati, ilmiy-tadqiqot ishlarini olib borayotgan yoshlarga alohida e’tibor berish, ilmiy maslahatlar berib borish masalalari ko‘rib chiqildi.

Yig‘ilish davomida bo‘lim boshliqlarining hisobotlari eshitildi. Shuningdek, oliy ta’lim muassasalari bakalavriatiga kirish test sinovlariga yuqori saviyada tayyorgarlik, test sinovlarini o‘tkazishda shaffoflikni ta’minlash, zamonaviy, adolatli, xolis shakl va usullardan foydalanishni keng yo‘lga qo‘yish, joriy yil tayyorgarligini o‘z vaqtida, yuqori sifat ta’minlangan holda yakunlash, abituriyentlar va ularning ota-onalari uchun qulay shart-sharoitlar yaratish, viloyatlardagi bo‘limlarda ijro intizomini yaxshilash, ish samaradorligi, mas’uliyat va javobgarlikni oshirish, murojaatlarni o‘z vaqtida, kechiktirmay ko‘rib chiqish, ularda ko‘tarilgan masalalarni hal etish yuzasidan tegishli vazifalar belgilab olindi.

Yig‘ilish yakunida sohaga oid davlat rahbari va hukumat tomonidan olib borilayotgan islohotlarga mos ravishda ish unumini tezkorlik va sifat jihatdan doimiy ravishda oshirib borish, Davlat test markazi zimmasiga yuklatilgan vazifalar ijrosini bugungi zamonaviy talab darajasida ta’minlash, jamoatchilik fikrini o‘rganish, zamonaviy texnologiyalardan keng foydalanish yuzasidan muhim qarorlar qabul qilindi.

Davlat test markazi axborot xizmati