Davlatimiz rahbarining 2017 yil 16 noyabrdagi 3389-son Qarori, Vazirlar Mahkamasining 2018 yil 3 apreldagi 261-son qarorida belgilangan topshiriqlar ijrosini ta'minlash maqsadida hududlarda test sinovi tartibi bo‘yicha repetitsiya jarayonlari bo‘lib o‘tmoqda.

Repetitsiyalar oliy ta'lim muassasalariga kirish test sinovlarini yuqori darajada va uyushqoqlik bilan o‘tkazish uchun sifatli tayyorgarlik ko‘rish, 2018/2019 o‘quv yilidan boshlab joriy etilayotgan o‘zgarishlar va foydalanilishi yo‘lga qo‘yilayotgan texnika vositalari aprobatsiyasiga bag‘ishlangan.

 Bugungi kunga qadar tadbirlar Qoraqalpog‘iston Respublikasi (14 may), Andijon (16 may), Surxondaryo (16 may) va Samarqand (17 may) viloyatlarida tashkil etildi.

Tadbirlarda Andijon shahrida 10 ta, Termiz shahrida 8 ta, Samarqand shahrida 10 shartli guruh ishtirok etdi. Abituriyentlar binolarga metallodetektorlar, videofiksatsiya va shaxsni identifikatsiyalash qurilmalari orqali kiritildi hamda uzluksiz videokuzatuv tizimlari qo‘llanilishi orqali test sinovi o‘tkazildi. Jarayonda mazkur texnika vositalarining amaldagi ish holati va imkoniyatlarini o‘rganish, tahlil qilish va baholash ishlari olib borildi.

Repetitsiya jarayonlari rejaga binoan may oyining oxirigacha boshqa hududlarda ham o‘tkaziladi.

Axborot  xizmati