Mamlakatimizda pandemik holat bo‘yicha barchamiz yaxshi ma'lumotga egamiz. Bunday vaziyatlarda qanday yo‘l tutishni ham yaxshi bilamiz. Shu bois, barcha fuqarolarimiz kabi tavsiya etilayotgan tartib-qoidalarga so‘zsiz amal qilmog‘imiz, bunday noxushliklarga qarshi hammamiz jipslashmog‘imiz, birga kurashmog‘imiz lozim.
Shu munosabat bilan Davlat test markazi tayyorgarlik ko‘rayotgan abituriyentlarga pandemiya davrida tayyorgarlik manbalarini ko‘chadan qidirmaslikni, taqdim etilayotgan ONLINE shakldagi manbalardan foydalanishni tavsiya etadi. 

Dtm.uz saytida bu borada barcha sharoitlar yaratilganligini eslatib o‘tamiz.

Mamlakatimizda ayni paytdagi holat vaqtinchadir. Unga qarshi kurashda chetda bo‘lmang. Bizlarning osoyishta hayotimiz, sog‘ligimiz uchun kechayu kunduz tinim bilmayotganlarning xizmatini hurmat qilaylik, o‘zimiz va yaqinlarimiz sog‘ligiga befarq bo‘lmaylik. Basharti, shu tengsiz, go‘zal, mard va taraqqiyparvar yurtning farzandi ekanmiz, uning porloq kelajagini xalqimiz bilan birgalikda yaratamiz. 
Bu yo‘lda barchamizga sog‘lik va muvaffaqiyat yor bo‘lsin. 

BIZ SIZLAR UCHUN ISHLAYMIZ. SIZLAR UYDA BO‘LING.

Davlat test markazi matbuot xizmati