Barchamiz kutgan, 2019 yil 29 aprel – 25 may kunlari bo‘lib o‘tgan Chet tilini bilish darajasini baholash sinovlari natijalari e'lon qilindi.

 Hozirgi kunda apellyasiya shikoyatlarini ko‘rib chiqish va ularga apellyasiya komissiyasi xulosalarini yuborish ishlari davom etmoqda.

Shuni eslatib o‘tmoqchi edikki, barcha talabgorlarda huquqlaridan tashqari majburiyatlar ham mavjud. Ya'ni, test sinovlarining tartib qoidalariga rioya qilmasdan sinovlardan chetlashtirilgan, o‘z vaqtini to‘g‘ri taqsimlay olmasdan test sinovlarini to‘liq yechib chiqolmaganlar tomonidan Davlat test markaziga yetmayotgan ballni qo‘shib berish yoki qaytadan imtihon qilish maslasi bo‘yicha ko‘p va ayrim hollarda qayta-qayta murojaat etishlar bo‘lmoqda.

Ma'lumki, test sinovlari O‘zbekiston Respublikasi Vazirlar Mahkamasining 2013 yil 31 dekabrdagi “Chet tilini bilish darajasini aniqlash va malaka sertifikati berish tartibi to‘g‘risidagi nizomni tasdiqlash haqida” 352-son qarori talablariga muvofiq o‘tkazib kelinmoqda. 

Mazkur qarorda belgilangan vaqtdan ortiqcha berish, Davlat test markazi tomonidan talabgorga sun'iy ravishda yetmayotgan balini qo‘shib berish, topshiriqlar uchun ajratilgan vaqtni to‘g‘ri taqsimlay olmagan talabgorlar uchun qayta imtihon o‘tkazish vakolati berilmagan va bular amaldagi me'yoriy-huquqiy hujjatlarga ziddir.

Ushbu tartib-qoidalarga Davlat test markazi va talabgorlar tomonidan qat'iy amal qilmaslik adolat, shaffoflik va xaqqoniylik prinsiplarining buzilishiga olib keladi.

O‘z navbatida Davlat test markazi shaffoflik va adolat prinsiplariga qat'iy rioya qilgan xolda talabgorlarning test sinovlari bilan bog‘liq barcha holatlar bo‘yicha to‘liq ma'lumot berilishini ma'lum qiladi.

Qo‘shimcha ravishda, Chet tilini bilish va egallash darajasini baholash sinovlaridan yetarli ball to‘play olmagan talabgorlar oliy ta'lim muassasalariga kirish sinovlarida В1 darajadagi testlarni yechish imkoniyati borligini ham eslatib o‘tamiz.

Barchangizga kirish imtihonlarida omad tilaymiz!

Davlat test markazi