O‘zbekiston Respublikasi Prezidentining 2021-yil 22-iyundagi PQ-5157-son qarorining 1a-ilovasi bilan 2021-2022-o‘quv yilida O‘zbekiston Respublikasi oliy ta’lim muassasalari bakalavriatining sirtqi ta’lim shakli bo‘yicha davlat buyurtmasi asosida o‘qishga qabul qilish parametrlari tasdiqlangan bo‘lib, respublikamizning 14 ta oliy ta’lim muassasasi uchun “Ijtimoiy ish (fuqarolarning o‘z-o‘zini boshqarish organlari)” ta’lim yo‘nalishiga qabul ko‘rsatkichlari ajratilgan.

Vazirlar Mahkamasining 2021-yil 8-yanvardagi 3-son qaroriga asosan 2021-2022-o‘quv yilidan boshlab pedagogika va moliya-iqtisod sohalaridagi oliy ta’lim muassasalarida “Ijtimoiy ish” bakalavriat ta’lim yo‘nalishi bo‘yicha fuqarolarning o‘zini o‘zi boshqarish organlari uchun sirtqi ta’lim shaklida kadrlar tayyorlash tizimini joriy etilishi belgilangan bo‘lib, “Ijtimoiy ish (fuqarolarning o‘z-o‘zini boshqarish organlari)” ta’lim yo‘nalishiga faqatgina Fuqarolarning o‘zini o‘zi boshqarish organlari xodimlari tavsiyanoma asosida o‘qishga kirishlari mumkin.

Bunda Mahalla va oilani qo‘llab-quvvatlash vazirligi tomonidan berilgan tavsiyanomaga ega bo‘lgan hamda kirish imtihonlaridan muvaffaqiyatli o‘tgan fuqarolarning o‘zini o‘zi boshqarish organlari xodimlari belgilangan tartibda talabalikka tavsiya etiladi.

Yuqoridagilardan kelib chiqqan holda boshqa toifadagi abituriyentlar “Ijtimoiy ish (fuqarolarning o‘zini-o‘zi boshqarish organlari)” ta’lim yo‘nalishi uchun tanlovda ishtirok eta olmaydi.

Shu sababli, my.dtm.uz sayti orqali onlayn ro‘yxatdan o‘tishda mazkur ta’lim yo‘nalishi chiqmaydi.

Qayd etish kerakki, oliy ta’lim muassasalarida “Ijtimoiy ish (oila va bolalar bilan ishlash)” ta’lim yo‘nalishi ham mavjud bo‘lib, abituriyentlar onlayn ro‘yxatdan o‘tishda mazkur ta’lim yo‘nalishini tanlashlari mumkin.

Davlat test markazi matbuot xizmati