Davlat test markazi va uning hududiy bo‘limlari tomonidan bugungi kunda amalga oshirilayotgan ishlar, amaldagi qaror va farmonlarning mazmun-mohiyati bilan tanishtirish, yoshlar va ota-onalarning murojaatlarini o‘rganish maqsadida joylarda sayyor qabullar o‘tkazilmoqda.

2021-yil 20-yanvar kuni Xorazm viloyatida navbatdagi sayyor qabul bo‘lib o‘tdi.

Davlat test markazi direktori o‘rinbosari Batirov Sherzod Negmuratovich rahbarligi va hududiy bo‘lim xodimlari hamkorligida Yangibozor tumani 23-son umumta’lim maktabida tashkil etilgan mazkur tadbirda viloyat Xalq ta’limi boshqarmasi, Yangibozor tumani xalq ta’limi rahbariyati, shuningdek, Urganch davlat universitetining pedagog xodimlari, umumta’lim maktablari rahbarlari, o‘qituvchilar hamda o‘quvchilar ishtirok etdilar.

Sayyor qabulda Davlat test markazi mas’ullari tomonidan asosiy e’tibor O‘zbekiston Respublikasi Prezidenti, Vazirlar Mahkamasining ta’lim muassasalariga qabul test sinovlarining adolatliligi va shaffofligini ta’minlash, test topshiruvchilar uchun yanada keng shart-sharoit va imkoniyatlar yaratish bo‘yicha qabul qilingan farmon va qarorlarining mazmun mohiyatini tushuntirishga qaratildi.

Shu bilan birga, joriy yil oliy ta’lim muassasalarining bakalavriat ta’lim yo‘nalishlariga qabul test sinovlarini soddalashtirish, test sinovlarini o‘tkazish bo‘yicha yangi kiritilayotgan o‘zgarish va yangiliklar, tegishli vazirlik va idoralar hamkorligida bu borada amalga oshirilayotgan ishlar mohiyati va shu kabi masalalarga qiziqish yuqori bo‘ldi. Buni so‘zga chiqqan pedagoglar, o‘qituvchilar va o‘quvchilarning muhim, dolzarb masalalar yuzasidan murojaatlarining mazmuni va sonidan anglash mumkin.

Davlat test markazi matbuot xizmati