Yurtimizda pandemiyaning oldini olish, tarqab ketmasligi yuzasidan muhim va tezkor ishlar olib borilmoqda. Shu munosabat bilan O‘zbekiston Respublikasi Prezidentining 2020-yil 19-martdagi “Koronavirus pandemiyasi va global inqiroz holatlarining iqtisodiyot tarmoqlariga salbiy ta’sirini yumshatish bo‘yicha birinchi navbatdagi chora-tadbirlar to‘g‘risida”gi PF–5969-sonli Farmoni qabul qilindi hamda O‘zbekiston Respublikasiga koronavirusning kirib kelishi va tarqalishini oldini olish yuzasidan chora-tadbirlar dasturini tayyorlash bo‘yicha respublika maxsus komissiyasining 2020-yil 21-martdagi 8-son yig‘ilish bayoni bilan cheklovlar qabul qilindi.

Ularda belgilangan talab va topshiriqlar ijrosini ta’minlash hamda COVID-19 – Koronavirus pandemiyasi munosabati bilan qo‘shimcha choralarni belgilash maqsadida Davlat test markazi direktori buyrug‘iga asosan muassasaning odatdagi faoliyat tartibiga o‘zgarishlar kiritildi. Ularga ko‘ra:

1. Xodimlarning masofadan turib – uy rejimida ishlashi, bunday ish rejimlaridagi mehnatni tashkil qilish va ish haqi to‘lash belgilandi.

2. Ish haqi saqlanmagan holda beriladigan ta’tillar mavjud vaziyatdan kelib chiqib, hozircha 1 oydan ko‘p bo‘lmagan muddatga ruxsat beriladigan bo‘ldi.

3. Masofadan, ya’ni uy rejimiga o‘tadigan ishlovchi xodimlarga o‘zlariga biriktirilgan kompyuter texnikalari ularning moddiy javobgarligi ostida topshirildi hamda vaqtincha uylarida ishlash uchun olib ketishga ruxsat berildi, shuningdek, internet tarmog‘iga ulanish uchun zarur xajmdagi trafiklar bo‘yicha sarf-xarajatlar ishxona tomonidan qoplanadi.

Belgilanishicha, hozircha markaziy apparat va hududiy bo‘limlarda faoliyat yuritayotgan umumiy xodimlarning 42,05 foiziga navbatdagi mehnat ta’tili, 3,6 foiziga ish haqi saqlanmagan holda ta’til berildi hamda masofadan ishlovchilar guruhi shakllantirildi.

Shuningdek, ishxonada mehnat qiluvchilar ro‘yxati tasdiqlanib, ular sog‘ligini himoya qilish borasida quyidagi vazifalar yuklatildi:

→ xodimlarning ish joylarini sanitariya talablariga to‘liq rioya qilgan holda muntazam dezinfeksiya qilib turilishini ta’minlash va nazorat qilib borish;

→ tegishli joylar (barcha xonalar, koridorlar, hojatxonalar)ni shaxsiy himoya va gigiyenik vositalari (sovun, antiseptik gellar va b.) bilan ta’minlash;

→ biriktirilgan hududlarga kiritiladigan davlat va shaxsiy avtomashinalarning dezinfeksiya qilinganligini nazorat qilish;

→ ish joyida va hududda xodimlarning shaxsiy gigiyena qoidalariga amal qilishi bo‘yicha eslatma, ko‘rgazma va boshqa muhim tezkor ma’lumotlar bo‘lishini ta’minlash, ularni yangilab va to‘ldirib borish kabilar.

Shular bilan birgalikda, tegishli bo‘linmaga xodimlarning bir joyga to‘planmaslik, masofa saqlash, qo‘l berib so‘rashmaslik, turli ommaviy tadbirlarda ishtirok etmaslik, uyushtirmaslik bo‘yicha ogohlantirib turish yuklatildi.

Davlat test markazi matbuot xizmati