Shu kunlarda jamoatchilik tomonidan Davlat test markaziga uning faoliyati bilan bog‘liq savollar kelib tushmoqda. Shularni hisobga olib, quyida bugungi holat bilan umumiy tarzda tanishtirib o‘tamiz.

Mamlakatimizda koronavirus infeksiyasining kirib kelishi va tarqalishini oldini olish bo‘yicha belgilangan karantin cheklovlari munosabati bilan Davlat test markazida 2020-yil 16-martdan boshlab guruhlarda ommaviy to‘planish asosida o‘tkaziladigan barcha turdagi test sinovlari, jumladan, nomzodlarni bir joyda to‘plash usulida bir necha bosqichda o‘tkazib kelingan chet tillariga oid sinovlar vaqtincha to‘xtatilgan. Lekin ruxsat bo‘lganda navbatdagi bunday sinovlarni o‘tkazish uchun hamma narsa tayyorlab qo‘yilgan, mutaxassislar ishlayapti. Ushbu sinovlarga ishtirok etishni istovchilardan onlayn ariza qabul qilish davom etmoqda.

Sertifikatlarni taqdim etish masalasida qayd etish kerakki, avvalgi bunday sinovlarni muvaffaqiyatli topshirgan nomzodlarning deyarli barchasiga tegishli sertifikatlar topshirilgan. Bugungi kunda tarqatilmagan sertifikatlar viloyatlarda yo‘q, faqat Toshkent shahrida yashovchi bir necha nomzod olmagan, xolos. Ular ham o‘z sertifikatlarini karantin muddati tugagandan keyin oldindan telefon orqali bog‘lanib, olib ketishlari mumkin.

Hozirga kunda faqat onlayn testlar mavjud. ONLAYN test tizimi orqali “Test topshiriqlari to‘plami 2019”dagi test topshiriqlari asosida e-Sinov, majburiy fanlar bo‘yicha shakllantirilgan test topshiriqlari asosida yo‘lga qo‘yilgan “ONLINE TEST” (ochiq testlar bilan ishlash) shakllaridagi test sinovlari davom etmoqda.

Onlayn test sinovlari Davlat test markazining rasmiy dtm.uz veb-sayti, 5fan.dtm.uz dasturi va @dtmxizmatbot telegram bot orqali amalga oshirilmoqda.

Oliy ta’lim muassasalarining bakalavriat ta’lim yo‘nalishlariga kirish test sinovlariga tayyorgarlik ko‘rish ishlari karantin davri uchun belgilangan reja asosida olib borilmoqda.

Bakalavriat ta’lim yo‘nalishlariga kirish test sinovlarini o‘tkazish muddati o‘zgarmagan. Test sinovlari o‘tkazish muddatlarining  o‘zgarish ehtimoli uzoq. Shunday bo‘lsa-da, o‘zgaradigan bo‘lsa, ommaviy axborot vositalari orqali batafsil ma’lum qilinadi.

Ayni kunlarda Davlat test markazining 50 foizdan ko‘p xodimlari navbatdagi mehnat ta’tiliga yoki o‘z hisobidan ta’tilga chiqarilgan. Ba’zi xodimlar bevosita muassasada va masofadan ishlarini davom ettirmoqdalar.

Davlat test markazi zimmasiga yuklatilgan eng dolzarb – test sinovlariga tayyorgarlik ko‘rish, test topshiriqlarini shakllantirish, ekspertizadan o‘tkazish, tarjima qilish ishlari amalga oshirilmoqda.

Shuningdek, pandemiya karantiniga qadar Davlat test markazida manfaatdor vazirlik va idoralar bilan hamkorlikda olib borilgan quyidagi ishlar karantindan keyin davom ettiriladi:

- ona tili (o‘zbek, rus, qoraqalpoq) va adabiyot fanidan bilimni baholashning milliy test tizimini yaratish, joriy etish;

- ular va majburiy fanlar bo‘yicha aprobatsiyalar o‘tkazish;

- kasbiy (ijodiy) imtihonlar bilan birgalikda majburiy uchta fan bo‘yicha test sinovlari topshiriladigan ta’lim yo‘nalishlariga oid ishlar;

- oliy pedagogik ta’lim yo‘nalishlariga qabul qilishda abituriyentlarning yozish ko‘nikmalari, intellektual salohiyati, psixologik barqarorligi va pedagoglik kasbiga moyilligi darajasini aniqlash mexanizmlarini ishlab chiqish.

Karantin uchun belgilangan vaqt tugagach va to‘liq tarkib bilan ishlash rejimiga o‘tilgach, belgilangan reja va hukumat qarorlari asosida amalga oshiriladigan ishlarning borishi yuzasidan ma’lumotlar beriladi.

Davlat test markazi rahbariyati va jamoasi barcha fuqarolarimizga sihat-salomatlik, ishlariga muvaffaqiyat hamda elning, xalqning yaktan-butunligi orqali, davlatimiz tomonidan belgilanayotgan chora-tadbirlarga to‘la amal qilish orqali umumiy ofatni yengishda sabr-toqat tilaydi.

Davlat test markazi matbuot xizmati