Usı kúnlerde jámiyetshilik tárepinen Mámleketlik test orayına onıń iskerligi menen baylanıslı sorawlar kelip túspekte. Usılardı inabatqa alıp, tómende búgingi jaǵday menen ulıwmalıq tárizde tanıstırıp ótemiz.

Mámleketimizde koronavirus infekciyasınıń kirip keliwi hám tarqalıwınıń aldın alıw boyınsha belgilengen karantin sheklewleri múnásibeti menen Mámleketlik test orayında 2020-jıl 16-marttan baslap toparlarda ǵalaba toplanıw tiykarında ótkeriletuǵın barlıq túrdegi test sınawları, ásirese, talabanlardı bir jerge toplaw usılında bir neshe basqıshta ótkizip kelingen shet tillerine baylanıslı sınawlar waqıtsha toqtatılǵan. Biraq ruqsat bolǵanda náwbettegi bunday sınawlardı ótkeriw ushın barlıq nárse tayarlap qoyılǵan, qánigeler islemekte. Bul sınawlarda qatnasıwdı qálewshilerden onlayn arza qabıllaw dawam etpekte.

Sertifikatlardı beriw máselesinde atap ótiw orınlı, aldınǵı bunday sınawlardı tabıslı tapsırǵan talabanlardıń derlik barlıǵına tiyisli sertifikatlar tapsırılǵan. Búgingi kúnde tarqatılmaǵan sertifikatlar wálayatlarda joq, tek Tashkent qalasında jasawshı bir neshe talaban almaǵan. Olar da óz sertifikatların karantin múddeti tamamlanǵannan soń aldınnan telefon arqalı baylanısıp, alıp ketiwine boladı.

Házirgi kúnde tek onlayn testler bar. ONLAYN test sisteması arqalı “Test tapsırmaları toplamı 2019”daǵı test tapsırmaları tiykarında e-Sinov, májbúriy pánler boyınsha qáliplestirilgen test tapsırmaları tiykarında jolǵa qoyılǵan  “ONLINE TEST” (ashıq testler menen islesiw) formalarındaǵı test sınawları dawam etpekte.

Onlayn test sınawları Mámleketlik test orayınıń rásmiy dtm.uz veb-saytı, 5fan.dtm.uz baǵdarlaması hám @dtmxizmatbot telegram bot arqalı ámelge asırılmaqta.

Joqarı bilimlendiriw mekemeleriniń bakalavriat bilimlendiriw baǵdarlarına kiriw test sınawlarına tayarlıq kóriw isleri karantin dáwiri ushın belgilengen joba tiykarında alıp barılmaqta.

Bakalavriat bilimlendiriw baǵdarlarına kiriw test sınawların ótkeriw múddeti ózgermegen. Eger ózgeretuǵın bolsa, ǵalaba xabar quralları arqalı tolıq málim etiledi.

Házirde Mámleketlik test orayınıń 50 payızınan kóp xızmetkeri náwbettegi miynet demalısına yaki óz esabınan demalısqa shıǵarılǵan. Bazı xızmetkerler tikkeley mekemede hám aralıqtan jumısların dawam ettirmekte.

Mámleketlik test orayı juwapkershiligine júklengen eń aktual – test sınawlarına tayarlıq kóriw, test tapsırmaların qáliplestiriw, ekspertizadan ótkeriw, awdarmalaw jumısları ámelge asırılmaqta.

Sonday-aq, pandemiya karantinine shekem Mámleketlik test orayında tiyisli ministrlik hám organlar menen birge alıp barılǵan tómendegi jumıslar karantinnen keyin dawam ettiriledi:

- ana tili (qaraqalpaq, ózbek, rus) hám ádebiyat páninen bilimdi bahalawdıń milliy test sistemasın jaratıw, en jaydırıw;

- olar hám májbúriy pánler boyınsha aprobaciyalar ótkiziw;

- kásiplik (dóretiwshilik) imtixanlar menen birgelikte májbúriy úsh pán boyınsha test sınawları tapsırılatuǵın bilimlendiriw baǵdarlarına baylanıslı jumıslar;

- joqarı pedagogikalıq bilimlendiriw baǵdarlarına qabıllawda abiturientlerdiń jazıw kónlikpeleri, intellektuallıǵı, psixologiyalıq turaqlılıǵı hám pedagoglıq kásipke beyimligi dárejesin anıqlaw mexanizmlerin islep shıǵıw.

Karantin ushın belgilengen waqıt tamalanǵannan soń hám tolıq quram menen islew rejimine ótilgennen keyin, belgilengen joba hám húkimetlik qararları tiykarında ámelge asırılatuǵın jumıslardıń barısı boyınsha maǵlıwmatlar beriledi.

Mámleketlik test orayı hákimshiligi hám jámááti barlıq puqaralarımızǵa densawlıq, jumıslarında tabıslar hám eldiń, xalıqtıń birligi arqalı, mámleketimiz tárepinen belgilenip atırǵan is-ilajlarǵa tolıq ámel etiw arqalı qáwipli infekciyanı jeńip shıǵıwda sabır tileydi.

Mámleketlik test orayı xabar xızmeti