2020-yil 5-mart kuni Davlat test markazi Kasaba uyushmasi a’zolarining umumiy yig‘ilishi bo‘lib o‘tdi.

Yig‘ilishda kasaba uyushmasi raisi kun tartibida belgilangan masalalarga muvofiq mehnat jamoasi oldida 2019-yilda amalga oshirilgan ishlar yuzasidan kengaytirilgan hisobot berdi. Qayd etilishicha, o‘tgan yilda sog‘ligini tiklash bo‘yicha murojaat qilgan va keksa yoshdagi xodimlarga sihatgohlarga yo‘llanmalar berildi. Shuningdek, umumxalq bayramlari, to‘y  yoki boshqa tadbirlar munosabati bilan kasaba uyushmasi Yunusobod tumani kengashi hamkorligida moddiy yordamlar, sovg‘alar tashkil etildi. Rejada belgilangan barcha vazifalar bajarilgan.

Yig‘ilishda kasaba uyushmasi qo‘mitasi a’zolarining faoliyat muddatlari tugaganligi sababli, yangi tarkibni saylash masalasi ko‘rib chiqildi. Mehnat jamoasining takliflariga ko‘ra, har bir boshqarmadan bir nafardan nomzodlar tavsiya etildi. Nomzodlar ro‘yxati sinchiklab o‘rganildi va tasdiqlandi.

Yakunda kasaba uyushmasi raisi tomonidan rahbariyat bilan hamkorlikda “Ilm, ma’rifat va raqamli iqtisodiyotni rivojlantirish yili” davlat Dasturida belgilangan vazifalarni amalga oshirish, mehnat jamoasini har qanday tazyiqdan himoya qilish, ayni paytda ishlayotgan va avval ishlab, nafaqaga chiqqan keksa yoshdagi xodimlarni ijtimoiy himoya qilish, yosh xodimlarni ilmiy-tadqiqot ishlarida qo‘llab-quvvatlash, Matbuot xizmati va Yuridik byuro bilan birgalikda huquqiy targ‘ibot ishlarining samarasini oshirish, kasaba uyushmasi vakolati doirasida yoshlarga oid boshqa masalalarni hal etish, Davlat test markazi kasaba uyushmasining moddiy mustaqilligini ta’minlash  bo‘yicha rejalari bilan tanishtirdi.

Umumiy yig‘ilishda belgilangan vazifalar, taklif va mulohazalar hisobga olinib, muhim qarorlar qabul qilindi.

Davlat test markazi matbuot xizmati