Ma’lumki, 2020-yil 12-oktabrda Vazirlar Mahkamasining “Umumta’lim fanlarini bilish darajasini baholashning milliy test tizimini joriy etish to‘g‘risida” 646-son qarori qabul qilingan bo‘lib, bosqichma-bosqich umumta’lim fanlaridan milliy test tizimi joriy etilmoqda.

Dastlab, ona tili va adabiyot hamda matematika fanlaridan milliy test tizimi joriy etilib, 2021-yil 13-14-aprel kunlari milliy sertifikatlash imtihonlari o‘tkazildi.

Hozirda kimyo va biologiya fanlaridan milliy test tizimini joriy etish bo‘yicha Xalq ta’limi vazirligi va Ta’lim sifatini nazorat qilish davlat inspeksiyasi bilan hamkorlikda tegishli ishlar amalga oshirilmoqda.

Jumladan, kimyo va biologiya fanlari spetsifikatsiyasi ishlab chiqilib, Davlat test markazining rasmiy veb-saytida e’lon qilindi va mazkur spetsifikatsiyalar asosida test topshiriqlari shakllantirilib, aprobatsiyadan o‘tkazish uchun namunaviy test variantlari tayyorlandi.

Bugun 22-aprel kuni mazkur test topshiriqlari aprobatsiyadan o‘tkazildi.

Aprobatsiya test sinovlari Qoraqalpog‘iston Respublikasi, viloyatlar va Toshkent shahrida tashkil etilib, unda 500 nafarga yaqin talabgor ishtirok etdi.

Davlat test markazi matbuot xizmati