O‘zbekiston Respublikasi Prezidenti huzurida joriy yil 2-mart kuni o‘tkazilgan 12-sonli yig‘ilishda belgilangan dolzarb topshiriqlar ijrosini ta’minlash doirasida 2020-yil 17-mart kuni Davlat test markazida Surxondaryo va Sirdaryo viloyatlarida umumta’lim maktablari o‘qituvchilari o‘rtasida o‘tkazilgan test sinovlari tajribasidan kelib chiqqan holda  boshqa hududlardagi umumta’lim maktablari o‘qituvchilari uchun test sinovlari o‘tkazishga bag‘ishlangan navbatdagi yig‘ilish bo‘lib o‘tdi.

Xalq ta’limi vazirligi vakili ishtirok etgan ushbu yig‘ilishda hududlarda test sinovini tashkil etish, o‘tkazishga oid, xususan, test sinovi topshiriladigan fanlar, test topshirish tili kesimida o‘qituvchilar soni, test topshiriqlari soni va ularni baholash mezonlari, test topshiruvchi o‘qituvchilar bazasi, test sinovini o‘tkazish muddati va joyi kabi masalalar muhokama etildi.

Tadbir yakunida ko‘rilgan masalalar yuzasidan tegishli takliflar ishlab chiqish va keyingi yig‘ilishda muhokama etishga kelishildi.

Davlat test markazi matbuot xizmati