Bugun, 18-iyun kuni Davlat test markazida Oliy Majlis Qonunchilik palatasi deputati, O‘zbekiston xalq shoiri Iqbol Mirzo ishtirokida “Mustaqillik – huquq, imkoniyat va burch demakdir” deb nomlangan ma’naviy-ma’rifiy tadbir bo‘lib o‘tdi.

O‘zbekiston Respublikasi mustaqilligining 30 yilligi doirasida tashkil etilgan tadbirda so‘zga chiqqan Iqbol Mirzo avvaliga mamlakatimizning iqtisodiy-siyosiy va ijtimoiy-siyosiy hayotida amalga oshirilayotgan bugungi islohotlar, uchinchi renessansning tub mohiyati va yurt taraqqiyotida pillapoya bo‘lishi, qonunchiligimizning mukammallashib hamda milliy va xalqaro normalarning o‘zlashtirilishi natijasida tobora globallashib borayotganligi, xalqimizning huquqiy ong va huquqiy madaniyati yuksalayotganligi, joriy yil yurtimizda belgilangan siyosiy tadbirlar, shuningdek, davlat tili masalalari to‘g‘risida batafsil ma’lumotlar berdi.

Ochiq muloqot shaklida o‘tgan tadbirda Iqbol Mirzo o‘z ijod namunalaridan ham o‘qib berdi. Ba’zi ko‘lamli nasriy asarlarining dunyoga kelish tafsilotlari bilan o‘rtoqlashdi.

Qiziqarli o‘tgan uchrashuv davomida ishtirokchilar tomonidan berilgan savollarga batafsil va misollar asosida javob berdi.

Adib  Davlat test markazi faoliyati, oldida turgan dolzarb vazifalarga to‘xtalib, bu yoshlarimiz hayotida ularni yetuk va raqobatbardosh kadr bo‘lib yetishishida muhim o‘rin tutishini ta’kidlab, xodimlarning ishlariga muvaffaqiyatlar tiladi.

Davlat test markazi matbuot xizmati