Ózbekstan Respublikası Prezidentiniń 2021-jıl 22-iyun sánesindegi PQ-5157-sanlı qararı menen 2021-2022-oqıw jılı qabıllawında mámleketlik joqarı bilimlendiriw mákemeleriniń magistratura (klinik ordinatura) qánigeliklerine oqıwǵa qabıllaw eki basqıshta ámelge asırıladı. Bunda:

• birinshi basqıshta mámleketlik joqarı bilimlendiriw mákemesi tárepinen tańlanǵan qánigelikke sáykes pánler boyınsha kiriw imtixanları;
• ekinshi basqıshta Mámleketlik test orayı tárepinen shet tili boyınsha test sınaqları ótkeriledi.

2021-jıl 8-iyul kúni Jaslardı qollap-quwatlaw telegram kanalında magistraturaǵa kiriw boyınsha ótkerilgen dawıslı chatda qánigelik pánleri boyınsha imtixanlardıń test sorawları Mámleketlik test orayınan shıǵıp ketkeni haqqında pikir bildirilgen.

Atap ótiw kerek, 2021-jılda bolıp ótetuǵın magistraturaǵa kiriw imtixanlarınıń birinshi basqıshı, yaǵnıy qánigelik páni boyınsha imtixanlar Mámleketlik test orayı tárepinen ótkerilmeydi hám qánigelik páninen test tapsırmaları Mámleketlik test orayı tárepinen dúzilmeydi. Ulıwma alǵanda, bul proceste Mámleketlik test orayı qatnaspaydı.

Tek ekinshi basqısh imtixanları, yaǵnıw shet tili boyınsha imtixanlar 2021-jılda Mámleketlik test orayı tárepinen ótkeriledi.

Búgingi kúnge shekem magistraturaǵa kiriw imtixanlarınıń birde bir basqıshı (shet tili imtixanı da) Mámleketlik test orayı tárepinen ótkerilmegen (Tashkent mámleketlik yuridikalıq universitetiniń magistraturasına kiriw imtixanlarınan tısqarı) hám Mámleketlik test orayı magistraturaǵa qabıllaw procesleriniń birde bir basqıshında qatnaspaǵan.

Mámleketlik test orayı barlıq ǵalaba xabar quralları, blogerler hám kanal administratorlarınan Mámleketlik test orayına tiyisli maǵlıwmatlardı beriwde Mámleketlik test orayına múrájat etiwin hám anıqlıq kirgizip alıwın soraydı hám olar menen birge islewige tayar ekenligin málim etedi.

Mámleketlik test orayı xabar xızmeti