O‘zbekiston Respublikasi Vazirlar Mahkamasi huzuridagi Davlat test markazi tomonidan matematika fanidan Milliy sertifikat berish tizimini yaratish bo‘yicha tayyorgarlik ishlari amalga oshirilmoqda.

Shu munosabat bilan 2020-yil 17-mart kuni Davlat test markazida matematika fanidan (o‘zbek va rus tillarida) aprobatsiya test sinovlari o‘tkazilishi rejalashtirildi. Test sinovlarida Toshkent shahri va Toshkent viloyatidagi ta’lim muassasalari bitiruvchilari ishtirok etishlari mumkin.

Aprobatsiya jarayonida ishtirok etish istagida bo‘lgan talabgorlar https://5fan.dtm.uz/ sayti orqali ro‘yxatdan o‘tishlari kerak.

Jarayonda ishtirok etuvchilar soni cheklangan bo‘lib, jami 600 ta ariza qabul qilinadi. Ulardan 1-smena uchun ro‘yxatdan o‘tgan 300 nafari 17-mart kuni soat 09:00 da, 2-smena uchun ro‘yxatdan o‘tgan 300 nafari soat 14:00 da aprobatsiya test sinovlariga jalb etiladi.

Ro‘yxatdan o‘tganda talabgorlarga aprobatsiyada ishtirok etish vaqti yozilgan ruxsatnoma taqdim etiladi.

Talabgorlar mazkur ruxsatnoma va shaxsini tasdiqlovchi hujjat bilan belgilangan vaqtdan 30 daqiqa oldin (1-smenada 08:30 gacha, 2-smenada 13:30 gacha) Davlat test markazi bosh binosi (Toshkent shahri, Yunusobod tumani, Bog‘ishamol ko‘chasi, 12-uy)ga kelishlari lozim.

Ro‘yxatdan o‘tish uchun sayt manzili: https://5fan.dtm.uz/math.

Ro‘yxatga olish 16-mart kuni soat 12:00 gacha davom etadi.

Ro‘yxatdan o‘tish va aprobatsiya jarayonida ishtirok etish bepul.

Davlat test markazi matbuot xizmati