2020-yil 7-fevral kuni Davlat test markazida ona tili (o‘zbek, rus va qoraqalpoq) va adabiyot fanidan Milliy sertifikat berish tizimi strukturasi va mazmuni muhokamasiga bag‘ishlangan seminar o‘tkazildi.

Unda Davlat test markazi, Respublika ta’lim markazi, Fanlar Akademiyasi, Toshkent davlat o‘zbek tili va adabiyoti universiteti, O‘zbekiston Milliy universiteti, Toshkent davlat pedagogika universiteti, O‘zbekiston jurnalistika va ommaviy kommunikatsiyalar universiteti va O‘zbekiston davlat jahon tillari universiteti mutaxassislari ishtirok etdi.

Seminarda Davlat test markazi mutaxassislari tomonidan Amerika Qo‘shma Shtatlarining SAT, Buyuk Britaniyaning GCSE va Rossiya Federatsiyasining YeGE imtihon tizimlari o‘rganilib, Davlat ta’lim standarti talablariga asosan ishlab chiqilgan ona tili (o‘zbek, rus va qoraqalpoq) va adabiyot fanidan Milliy sertifikat berish imtihon tizimi strukturasi va mazmuni muhokama qilindi.

Unda dastlab, Davlat test markazi mutaxassislari tomonidan ona tili (o‘zbek, rus va qoraqalpoq) va adabiyot fanidan Milliy sertifikat berish imtihon tizimi strukturasi va mazmuni taqdimot qilindi hamda ilmiy asoslari keltirildi. So‘ngra, imtihon tizimi strukturasi va mazmuni muhokama qilinib, fikrlar almashildi hamda seminar qatnashchilarining taklif va mulohazalari olindi.

Seminar qizg‘in bahs-munozara tarzida bo‘lib o‘tdi.

Davlat test markazi matbuot xizmati