2020-yil 6-iyul kuni soat 15:00 da AOKA huzuridagi shtabda Davlat test markazi ishtirokida brifing bo‘lib o‘tdi.

Brifingda abituriyentlarning onlayn ro‘yxatdan o‘tishi bilan bog‘liq savollarga javoblar berildi.

 

1-savol: Davlat test markazining sayti orqali ro‘yxatdan o‘tganman. Tanlagan ta’lim yo‘nalishlarimni o‘zgartirsam bo‘ladimi?

Javob: Abituriyentlar ro‘yxatdan o‘tish muddati tugagun (20-iyul)ga qadar doimiy yashash manzilini, tugatgan ta’lim muassasasini, imtiyozlarini va tanlagan ta’lim yo‘nalishlarini o‘zgartirishi mumkin.

 

2-savol: Men 2020-yilda kollejni tugatdim. Ro‘yxatdan o‘tishda tugatgan ta’lim muassasasi ma’lumotlarini o‘zgartira olmayapman. Qanday o‘zgartirsam bo‘ladi?

Javob: Yurtimizda karantin cheklovlari joriy etilganligi sababli, joriy yil bitiruvchilariga shahodatnoma va diplomlar elektron shaklda yetkazilishi, asl nusxalari esa epidemiologik vaziyat yaxshilanganidan keyin topshirilishi belgilandi.

Joriy yil bitiruvchilariga qulaylik yaratish maqsadida ularning tugatgan ta’lim muassasasi bo‘yicha ma’lumotlari tegishli vazirliklardan, ya’ni, umumta’lim maktablari bitiruvchilarining ma’lumotlari Xalq ta’limi vazirligidan, akademik litsey va kasb-hunar-kollejlari bitiruvchilarining ma’lumotlari Oliy va o‘rta maxsus ta’lim vazirligidan olinmoqda.

Bunda joriy yil bitiruvchilari ro‘yxatdan o‘tish vaqtida bu ma’lumotlarni o‘zgartira olmaydi.

 

3-savol: Fuqaroligi yo‘q shaxslar oliy ta’lim muassasalarining bakalavriat ta’lim yo‘nalishlariga qanday ro‘yxatdan o‘tadi?

Javob: Fuqaroligi yo‘q shaxslar ro‘yxatdan o‘tish uchun o‘ziga eng yaqin bo‘lgan istalgan davlat oliy ta’lim muassasasiga borib, ro‘yxatdan o‘tishlari mumkin.

Shuningdek, chet el fuqarolari ham ro‘yxatdan o‘tish uchun OTMlariga murojaat qilishlari kerak.

 

4-savol: Men Toshkent tibbiyot akademiyasining “Oliy hamshiralik ishi” ta’lim yo‘nalishiga ro‘yxatdan o‘tmoqchiman. Lekin dasturda bu yo‘nalish chiqmayapti. Nima qilsam bo‘ladi?

Javob: Vazirlar Mahkamasining 2017-yil 20-iyundagi 393-son qaroriga muvofiq “Oliy hamshiralik ishi” ta’lim yo‘nalishiga qabul faqat o‘rta maxsus, kasb-hunar tibbiy ma’lumot negizida amalga oshiriladi.

Tibbiyot ta’lim muassasalarini hamshiralik, akusherlik ishi yoki feldsherlik ixtisosliklari bo‘yicha tamomlagan abituriyentlar o‘ziga eng yaqin bo‘lgan istalgan Respublika tibbiyot oliy ta’lim muassasasiga borib, “Oliy hamshiralik ishi” ta’lim yo‘nalishiga ro‘yxatdan o‘tishlari mumkin.

 

5-savol: Harbiy OTMga hujjat topshirgan abituriyentlar harbiy bo‘lmagan OTMlarga ham topshirishi mumkinmi?

Javob: Mumkin. Abituriyentlar oliy harbiy ta’lim muassasalariga o‘qishga kirish bo‘yicha ro‘yxatdan o‘tishda test topshiriladigan fanlar majmuasi va ketma-ketligi bir xil bo‘lgan harbiy bo‘lmagan OTMlarning 5 tagacha bakalavriat ta’lim yo‘nalishlarini tanlashlari mumkin.

Bunda oliy harbiy ta’lim muassasalariga o‘qishga kirish test sinovlari respublika oliy ta’lim muassasalariga o‘tkaziladigan test sinovlari bilan bir vaqtda nomzodlar o‘zlari tanlagan hududlarda o‘tkaziladi.

 

6-savol: IELTS imtihoni javobi 20-iyuldan keyin chiqsa, imtiyozlarga IELTS sertifikatini qo‘shsa bo‘ladimi?

Javob: Abituriyentlar o‘z ma’lumotlarini 20-iyulga qadar o‘zgartirishlari mumkin. Qabul yakunlangan (20-iyul)dan so‘ng ma’lumotlarni o‘zgartirish mumkin emas.

 

7-savol: Nogironligi bo‘lgan shaxslar sirtqi ta’lim shakliga topshirganda imtiyozi saqlanib qoladimi?

Javob: Saqlanib qoladi. Chunki nogironligi bo‘lgan shaxslarga kunduzgi, sirtqi va kechki ta’lim shakllari bo‘yicha ham qo‘shimcha kvotalar ajratilgan.

 

8-savol: Harbiy qism qo‘mondonligi tavsiyanomasiga ega abituriyentlarga sirtqi ta’lim shakli bo‘yicha qo‘shimcha kvota ajratilganmi?

Javob: O‘zbekiston Respublikasi ta’lim muassasalariga o‘qishga qabul qilish bo‘yicha Davlat komissiyasining 1-son bayoni bilan harbiy qism qo‘mondonligi tavsiyanomasiga ega abituriyentlar uchun ta’lim shakllari bo‘yicha OTMlar kesimida alohida 5 foizli qo‘shimcha kvotalar ajratilgan.

Bunda kunduzgi ta’lim shakli bo‘yicha jami 5 179 ta, shundan davlat granti asosida 1 175 ta va to‘lov-kontrakt asosida 4 004 ta kvota ajratilgan.

Sirtqi va kechki ta’lim shakllari bo‘yicha esa to‘lov-kontrakt asosida mos ravishda 1 568 ta va 251 ta qo‘shimcha kvotalar ajratilgan.

 

9-savol: Menda harbiy xizmatchilarning farzandlari uchun beriladigan tavsiyanoma mavjud. Lekin ro‘yxatdan o‘tishda sizda hech qanday imtiyoz mavjud emas deb chiqmoqda. Nima qilsam bo‘ladi?

Javob: “Nogironligi bo‘lgan shaxslar”, “Ko‘zi ojizlar”, “Harbiy qism qo‘mondonligi tavsiyanomasi” yoki “Chet tili sertifikati”ga ega abituriyentlar ro‘yxatdan o‘tishda imtiyozlarini o‘zlari kiritadilar.

Agar abituriyentda boshqa turdagi imtiyozlar bo‘lsa, bu imtiyozlar tegishli vazirlik va idoralardan olingan ma’lumotlar asosida avtomatik to‘ldiriladi.

Ro‘yxatdan o‘tganingizda sizning imtiyozingiz mavjud emas deb chiqayotgan bo‘lsa, sizga tavsiyanoma bergan vazirlik yoki idoraga murojaat qilishingiz kerak.

 

10-savol: Ro‘xyatdan o‘tgandan so‘ng, test sinovi uchun to‘lovni qanday amalga oshirsam bo‘ladi?

Javob: Ro‘yxatdan o‘tish yakunlanganda, abituriyentning shaxsiy kabinetida bazaviy hisoblash miqdorining yarim baravari miqdorida to‘lovni amalga oshirish uchun invoys hosil bo‘ladi.

Invoysning quyi qismida onlayn to‘lov tizimlari orqali to‘lovni amalga oshirish uchun havolalar joylashgan bo‘lib, ular orqali to‘lovni amalga oshirish imkoniyati mavjud.

Umuman olganda, to‘lovni Click, Payme, UPAY, Paynet kabi elektron to‘lov tizimlari yoki bank kassalari orqali amalga oshirish mumkin.

 

11-savol: Test sinovi uchun to‘lovni amalga oshirgandan so‘ng tekshirish imkoni bormi?

Javob: To‘lov muvaffaqiyatli amalga oshirilganini “Shaxsiy kabinet”dagi “Qabul-2020” bo‘limiga kirib bilib olish mumkin.

Bunda, abituriyent qayd varaqasining quyi qismida “To‘lovingiz muvaffaqiyatli amalga oshirildi!” degan xabar chiqadi.

Bundan tashqari, to‘lovni muvaffaqiyatli amalga oshirgan abituriyentlarning telefon raqamiga “To‘lovingiz muvaffaqiyatli amalga oshirildi!” degan SMS xabar yuboriladi.

 

12-savol: Men Davlat test markazining sayti orqali ro‘yxatdan o‘tdim. Lekin menga to‘lovni amalga oshirish uchun invoys chiqmadi. Nima uchun?

Javob: Ma’lum toifadagi abituriyentlar test sinovida ishtirok etish uchun to‘lovni amalga oshirmaydi. Shuning uchun mazkur toifadagi abituriyentlarga invoys shakllantirilmaydi.

 

13-savol: Kimlar test sinovi uchun to‘lovni amalga oshirmaydi?

Javob: To‘lovni amalga oshirmaydigan abituriyentlar:

• Ta’lim muassasalari (maktab, litsey va kollejlar)ni 2020-yilda tamomlaganlar.
• Birinchi va ikkinchi guruh nogironligi bor shaxslar.
• To‘liq davlat ta’minotidagi shaxslar.
• Chet el fuqarolari.
• Alohida iqtidor talab etiladigan  ta’lim yo‘nalishlariga (ma’daniyat, san’at, sport, …) ro‘yxatdan o‘tgan abituriyentlar.
• Test sinovlarisiz, ko‘p balli tizim bo‘yicha imtihon o‘tkaziladigan va o‘qitish qozoq, turkman va qirg‘iz tillarida olib boriladigan ta’lim yo‘nalishlariga topshirganlar.
• Ota (onasi) xizmat vaqtida halok bo‘lgan yoki nogiron bo‘lib qolgan harbiy xizmatchilarning farzandlari.
• Ota (onasi) xizmat vaqtida halok bo‘lgan yoki nogiron bo‘lib qolgan ichki ishlar organlari xodimlari farzandlari.
• Yoshlar ittifoqi tavsiyanomasiga ega abituriyentlar (respublika bosqichi g‘oliblari).
• Harbiy qism qo‘mondonligi va Yoshlar ittifoqi tomonidan birgalikda beriladigan tavsiyanomaga ega abituriyentlar.
• Tanlov yoki musobaqa g‘oliblari hamda davlat mukofoti sohiblari (Xalqaro fan olimpiadasi, Respublika va xalqaro sport musobaqalari, Zulfiya mukofoti, Tarbiyachi tanlovi, Hamshira tanlovi, Nihol mukofoti, Kelajak ovozi, Badiiy akademiya, Mard o‘g‘lon).

 

14-savol: Davlat test markazining sayti orqali ro‘yxatdan o‘tdim. Test sinovida ishtirok etish uchun ruxsatnomani qayerdan olsam bo‘ladi?

Javob: Abituriyentlar test sinovida ishtirok etish uchun “Abituriyent ruxsatnomasi”ni ro‘yxatdan o‘tish to‘liq yakunlanganidan so‘ng, abitur.dtm.uz sayti orqali shaxsiy kabinetidan yuklab olishlari mumkin.