2021-jıldıń 1-yarımı dawamında kóshpeli qabıllawlar ótkeriw jobasına muwapıq Ózbekstan Respublikası Ministrler Kabineti janındaǵı Mámleketlik test orayı tárepinen shólkemlestirilip atırǵan kóshpeli qabıllawlar dawam etpekte.

Joba sheńberinde usı jılı 21-yanvar kúni Mámleketlik test orayı direktor orınbasarı Batirov Sherzod Negmuratovich hám Mámleketlik test orayınıń Qaraqalpaqstan Respublikasındaǵı aymaqlıq bólimi xızmetkerleri tárepinen orınlarda kóshpeli qabıllawlar ótkerildi.

Birinshi qabıllaw Nókis qalasındaǵı 46-sanlı qánigelestirilgen mektebiniń májilisler zalında 220 dan artıq puqara – jaslar, pitkeriwshi oqıwshılar, oqıtıwshılar hám ata-anaları qatnasında bolıp ótti. Sonday-aq, sol kúnniń ózinde Shımbay rayonındaǵı TashMAU Nókis filialınıń akademiyalıq liceyiniń belsendiler zalında da náwbettegi ushırasıw shólkemlestirildi. Onda 168 pitkeriwshi oqıwshılar, oqıtıwshılar, ata-analar, mámleketlik emes bilimlendiriw mekemeleriniń oqıtıwshıları qatnastı.

Ashıq pikirlesiw tárizinde ótkerilgen eki ilaj da qabıllaw test sınaqlarına tiyisli sońǵı jańalıqlar, kirgiziliwi kútilip atırǵan ózgerisler, test sınaǵın ótkeriw barısın ápiwayılastırıw, test tapsırıwshılar ushın jáne de keń imkaniyatlar, shárt-sharayatlar jaratıw, logikalıq pikirlewge baǵdarlanǵan test tapsırmaların qáliplestiriw hám ulıwma bilimlendiriw pánlerinen milliy test sistemasın engiziw, sonday-aq, Mámleketlik test orayınıń iskerligin tártipke salıwshı normativ-huqıqıy hújjetlerine sholıw, olardıń mazmun-mánsin túsindiriwge arnaldı.  

Qızıǵıwshı jaslar hám olardıń ata-anaları, oqıtıwshılar tárepinen bildirilgen pikir hám usınıslar tıńlandı, sorawlarına juwaplar berildi.

Mámleketlik test orayı xabar xızmeti