Hurmatli talabgorlar!

Oʻzbekiston Respublikasi Vazirlar Mahkamasi huzuridagi Davlat test markazi aprel-may oylarida chet tilini bilish va egallash darajasini baholash uchun joriy yilning 
25-martidan nsfla.uz saytida onlayn roʻyxatdan oʻtish boshlanishini maʼlum qiladi.

Roʻyxatdan oʻtayotganingizda oʻta eʼtiborli boʻlishingiz talab etiladi! Toʻldirishdan oldin barcha bandlar bilan batafsil tanishib chiqing. Arizani toʻldirish toʻgʻrisidagi tartibga toʻliq rioya etishingiz soʻraladi.

Siz qoʻshimcha bandda tanlagan yoʻnalishingiz va hujjat topshirayotgan oliy taʼlim muassasangizni aniq koʻrsatishingiz lozim (masalan, Chet tili fani birinchi (asosiy) fan sifatida kiritilgan taʼlim yoʻnalishlari, “Toshkent davlat yuridik universiteti”, “Jahon iqtisodiyoti va diplomatiya universiteti” yoki “Boshqa oliy taʼlim muassasasi”).

Oʻzbekiston Respublikasi Vazirlar Mahkamasining “Taʼlim muassasalariga oʻqishga qabul qilishda milliy hamda xalqaro baholash tizimlari sertifikatlarini tatbiq qilish toʻgʻrisida”gi qaror loyihasi ayni paytda oʻrnatilgan tartibda koʻrib chiqilayotganligini Sizga maʼlum qilamiz.

Vazirlar Mahkamasi qarori loyihasida chet tili fani birinchi (asosiy) fan sifatida kiritilgan bakalavriat taʼlim yoʻnalishlarida kirish imtihonlaridan imtiyoz belgilanishi uchun B2 daraja talab etilishi taklif etilgan.

Taʼkidlash joizki, Vazirlar Mahkamasining qarori tasdiqlanganidan soʻng Chet tili fani birinchi (asosiy) fan sifatida kiritilgan taʼlim yoʻnalishlari, “Toshkent davlat yuridik universiteti”ga imtiyoz uchun talab B2 darajada belgilansa, Siz tomoningizdan arizada belgilangan B1 darajasi shu yoʻnalish va oliy taʼlim muassasasini tanlagan talabgorlar uchun avtomatik tarzda B2 darajaga oʻzgartiriladi. Bu toʻgʻrisida talabgorlar roʻyxatdan oʻtish davrida oʻz roziligini bildirishi lozim.

Test sinovlarini odilona va shaffof oʻtkazish maqsadida barcha talabgorlar tomonidan hujjatlarni shaxsan topshirishlari hamda barmoq izlarini skanerdan oʻtkazishlari talab qilinadi.

Hujjatlarni Toshkent shahri va viloyatida bevosita Davlat test markazida hamda Qoraqalpogʻiston Respublikasi va viloyatlardagi hududiy boʻlinmalarda qabul qilinishini maʼlum qilamiz. Hududiy boʻlinmalar toʻgʻrisidagi maʼlumotlar talabgorning shaxsiy kabinetida (my.nsfla.uz) maʼlum qilingan.

Barchangizga omad tilaymiz!!!