Hozirgi kunda fuqarolar tomonidan Davlat test markaziga o‘qishni ko‘chirish va qayta tiklash, magistraturaga hujjatlarni qabul qilish va kirish imtihonlarini o‘tkazish hamda ikkinchi ta’limga qabul bo‘yicha ko‘plab savollar kelib tushmoqda.

Prezident qaroriga ko‘ra, davlat oliy ta’lim muassasalarining magistratura mutaxassisliklariga o‘qishga kirish, shuningdek, bakalavriat ta’lim yo‘nalishlariga o‘qishni ko‘chirish va qayta tiklash uchun hujjatlarni topshirish jarayoni Oliy va o‘rta maxsus ta’lim vazirligining rasmiy veb-sayti (www.edu.uz) orqali amalga oshiriladi.

O‘qishni ko‘chirish va qayta tiklash bo‘yicha hujjatlar 2020-yil 15-iyuldan 5-avgustgacha transfer.edu.uz sayti orqali, magistraturaga hujjatlar esa 2020-yil 1-iyuldan 30-iyulgacha magistr.edu.uz sayti orqali qabul qilinadi.

Magistraturaga qabul Oliy va o‘rta maxsus ta’lim vazirligi tomonidan koronavirus pandemiyasi sharoitidan kelib chiqib, onlayn test o‘tkazish orqali O‘zbekiston Respublikasi Prezidenti qarori bilan belgilangan davlat granti va to‘lov-kontrakt asosida qabul parametrlariga muvofiq amalga oshiriladi.

Shuni ma’lum qilamizki, o‘qishni ko‘chirish va qayta tiklash, magistraturaga hujjatlarni qabul qilish va kirish imtihonlarini o‘tkazish hamda ikkinchi ta’limga qabul Davlat test markazi vakolatiga kirmaydi.

Agar sizda mazkur masalalar bo‘yicha savollar bo‘lsa, Oliy va o‘rta maxsus ta’lim vazirligiga murojaat qilishingiz maqsadga muvofiq.

Davlat test markazi matbuot xizmati