2022-yil 24-mart kuni telegramdagi kanallardan birida “Gap boshqa ish boshqa...” sarlavhasi ostida post e’lon qilindi.

Unda o‘qituvchilarni attestatsiyadan o‘tkazish jarayoni tanqid qilinib, “... Aytishlaricha, bugun Toshkent shahrida, ertaga Buxoroda boshlang‘ich ta’lim o‘qituvchilari attestatsiyadan o‘tkaziladi. Jarayonda test markazining ham ishtiroki bor...”, deyilgan.

Bu bo‘yicha shuni ma’lum qilamizki, oliy ta’lim muassalari, xalq ta’limi tizimidagi ta’lim muassasalari va professional ta’lim muassasalarida faoliyat yuritayotgan o‘qituvchilarlarni attestatsiyadan o‘tkazish, shuningdek, ta’lim muassasalarini akkreditatsiyalash jarayonlarini tashkil etish va o‘tkazish uchun vakolatli davlat organi – Ta’lim sifatini nazorat qilish davlat inspeksiyasi hisoblanadi.

O‘qituvchilar attestatsiyasi va ta’lim muassasalarini akkreditatsiyalash Davlat test markazi vakolatiga kirmaydi va mazkur jarayonlarda Davlat test markazi ishtirok etmaydi.

Shuningdek, qo‘shimcha ma’lumot sifatida qayd etish lozimki, Buxoro viloyatida o‘qituvchilarni attestatsiyadan o‘tkazishda Davlat test markazining Buxoro viloyatidagi binosidan foydalanish bo‘yicha viloyat hokimligi va Ta’lim sifatini nazorat qilish davlat inspeksiyasi tomonidan murojaat tushgan. Mazkur murojaat asosida binodan foydalanishga ruxsat berilgan, xolos. Attestatsiya jarayonida Davlat test markazi va uning xodimlari ishtirok etmaydi.

Davlat test markazi matbuot xizmati