O‘zbekiston Respublikasi Prezidentining 2021-yil 19-may kuni qabul qilingan “O‘zbekiston Respublikasida xorijiy tillarni o‘rganishni ommalashtirish faoliyatini sifat jihatidan yangi bosqichga olib chiqish chora-tadbirlari to‘g‘risida”gi PQ-5117-son hamda Vazirlar Mahkamasining “Xorijiy tillarni o‘rganishni ommalashtirishni samarali tashkil etish chora-tadbirlari to‘g‘risida”gi 312-son qarorlariga muvofiq Samarqand iqtisodiyot va servis hamda Samarqand davlat chet tillar institutlarining murojaatlariga asosan mazkur oliy ta’lim muassasalarida faoliyat yuritayotgan o‘qituvchilarning chet tilini bilish darajasini aniqlash imtihonlari o‘tkazilmoqda.
Imtihon Samarqand davlat chet tillar institutida tashkil etilgan bo‘lib, 2021-yil 15-iyun kuni test sinovlarining yozma (tinglab tushunish, o‘qish, leksik va grammatik kompetensiyalar, yozma ish) qismi bo‘lib o‘tdi.
Test sinovlari ingliz, nemis, fransuz, ispan, italyan, xitoy, koreys, yapon, turk va arab tillaridan B1, B2 va C1 tilni bilish darajalari bo‘yicha o‘tkazildi.
16-iyun kuni test sinovida ishtirok etgan o‘qituvchilarning gapirish ko‘nikmasi baholanadi.
Test sinovi yakunlariga ko‘ra, maksimal ballning 60 foizi va undan yuqori ball to‘plagan o‘qituvchilar test sinovidan muvaffaqiyatli o‘tgan hisoblanadi va ularga tegishli sertifikatlar beriladi.
Davlat test markazi matbuot xizmati
O‘zbek tili va adabiyot fanidan milliy sertifikat imtihonlari bo‘yicha bildirilgan fikrlarga rasmiy munosabat