2024/2025-o‘quv yili uchun Huquqni muhofaza qilish akademiyasining “Tergov faoliyati” bakalavriat ta’lim yo‘nalishiga joriy yilning 1-fevralidan qabul boshlangani ma’lum qilinadi.

Akademiyaning “Tergov faoliyati” yo‘nalishi bo‘yicha kunduzgi ta’lim shakliga o‘qishga qabul qilish tanlov, teng huquqlilik prinsiplari va qabul qilishning yagona qoidalari asosida quyidagi bosqichlarda tashkil etiladi:

dastlabki tanlov;

maxsus psixologik tanlov;

yozma imtihon (diktant);

test sinovlari.

Dastlabki tanlov harbiylashtirilgan tuzilmalar (Davlat xavfsizlik xizmati, Ichki ishlar vazirligi, Milliy gvardiya, Bojxona qo‘mitasi, Harbiy prokuratura);

harbiylashtirilmagan tashkilotlar (prokuratura organlari, shu jumladan, Iqtisodiy jinoyatlarga qarshi kurashish departamenti, Majburiy ijro byurosi)dagi talablarni inobatga olgan holda alohida tartibda amalga oshiriladi.

Bunda nomzod o‘z hujjatlarini harbiylashtirilgan yoki harbiylashtirilmagan soha bo‘yicha topshirishi lozim.

Nomzod joriy yilning 1-fevralidan 1-martiga qadar Bilimni baholash agentligining maxsus elektron platformasida (https://my.uzbmb.uz/) ro‘yxatdan o‘tishi lozim.

Shuningdek, nomzod ko‘rsatilgan muddatlarda harbiylashtirilgan yo‘nalish bo‘yicha – hududiy ichki ishlar organlariga;

harbiylashtirilmagan yo‘nalish bo‘yicha – hududiy prokuratura organlariga tegishli hujjatlarni taqdim etadi.

Akademiyaning “Tergov faoliyati” bakalavriat ta’lim yo‘nalishida ta’lim olish muddati uch yilni tashkil etib, bitiruvchilarga belgilangan davlat namunasidagi diplom beriladi.

O‘qitish o‘zbek va rus tillarida, davlat granti asosida tashkil etiladi. Davlat granti asosida o‘qishni tamomlagan bitiruvchilarga vakolatli davlat organlarida kamida uch yil ishlab berish majburiyati yuklanadi.

Akademiyaga qabul qilishda abituriyentlarning muayyan toifalariga respublikaning boshqa oliy ta’lim muassasalariga kirish uchun qonunchilik hujjatlarida nazarda tutilgan imtiyozlar tatbiq etilmaydi.

Akademiyaning “Tergov faoliyati” bakalavriat ta’lim yo‘nalishi bitiruvchilari vakolatli davlat organlariga xizmatga qabul qilinganda faqat ofitserlar tarkibiga kiruvchi yoki darajali unvon berilishi ko‘zda tutilgan lavozimlarga tayinlanadi.

Huquqni muhofaza qilish akademiyasi bakalavriatiga kirish imtihonlariga oid yangiliklar bilan akademiyaning rasmiy veb-sayti (https://proacademy.uz/uz-cyr/menu/bakalavriat), shuningdek, ijtimoiy tarmoqlardagi rasmiy sahifalari: www.facebook.com/ProsecutorAcademy, www.instagram.com/proacademyuz/ (https://t.me/TheLawEnforcementAcademy) hamda ommaviy axborot vositalari orqali tanishib borishingiz mumkin.

Bakalavriat ta’lim yo‘nalishiga kirish bilan bog‘liq savollarga 71 202-04-96 (ichki 1727) telefon raqami orqali javob olishingiz mumkin.

Shuningdek, o‘qishga qabul qilish talablari bilan Vazirlar Mahkamasining 2023-yil 6-apreldagi “O‘zbekiston Respublikasi Huquqni muhofaza qilish akademiyasida oliy ta’lim va oliy ta’limdan keyingi ta’limga qabul qilish va o‘qitish tartibini belgilash chora-tadbirlari to‘g‘risida” 143-son qarori bilan tasdiqlangan “O‘zbekiston Respublikasi Huquqni muhofaza qilish akademiyasi bakalavriatiga o‘qishga qabul qilish va o‘qitishni tashkil etish tartibi to‘g‘risida NIZOM” orqali tanishish mumkin.