2021-yil 2-dekabr kuni Davlat test markazida “Ochiq eshiklar kuni” tashkil etilib, unda Yunusobod tumanidagi 70-umumiy o‘rta ta’lim maktabi va Toshkent axborot texnologiyalari universiteti akademik litseyining bitiruvchilari hamda ommaviy axborot vositalari vakillari ishtirok etdilar.

Tadbir Davlat test markazi direktori Karimov Madjit Malikovichning kirish so‘zi bilan ochildi va ishtirokchilarga dastur tanishtirildi.

Tadbirning avvalida Prezidentimizning sohaga oid qarorlari, famonlari, “Yoshlarni qo‘llab-quvvatlash va aholi salomatligini mustahkam yili” Davlat dasturidan kelib chiqqan holda kirish test sinovlariga oid eng so‘nggi yangiliklar, kutilayotgan o‘zgarishlar, test sinovi jarayonlarini soddalashtirish, test topshiruvchilar uchun yanada kengroq imkoniyat, qulayliklarga asoslangan shart-sharoitlar yaratish, mantiqiy fikrlashga yo‘naltirilgan test topshiriqlaridan kengroq foydalanish, umumta’lim fanlaridan milliy test tizimi, shuningdek, Davlat test markazi faoliyatini tartibga soluvchi yangi normativ-huquqiy hujjatlar, qarorlar loyihalari sharhi, mazmun-mohiyatiga bo‘yicha keng ma’lumotlar berildi.

Shundan so‘ng yoshlar doimiy maxsus, yopiq rejimdagi binoda faoliyat olib boruvchi boshqarma va bo‘limlar foliyati bilan tanishish, jarayonlarni o‘z ko‘zlari bilan ko‘rish uchun taklif etildilar. “Ochiq eshiklar kuni”ga tashrif buyurganlar test sinovlarini tashkil etish, tayyorgarlik ko‘rish, ishlarni onlayn shaklda yo‘lga qo‘yish, test topshiriqlarini shakllantirish, generatsiyalash, kitoblarni nashr etish va manzillari bo‘yicha jo‘natish, qabul qilish hamda Davlat test markaziga olib kelingan javoblar varaqalari asosida natijalarni hisoblash jarayonlari bilan yaqindan tanishtirildi.

Faoliyat bilan tanishuv tugagach, bitiruvchi yoshlarni test sinovi jarayoni bilan yaqindan tanishtirish, ko‘nikma hosil qilish maqsadida ular ishtirokida majburiy fanlardan test sinovi o‘tkazildi.

Voqealar rivoji ishtirokchilarda katta qiziqish uyg‘otdi. Bitiruvchilar va jurnalistlarni qiziqtirgan barcha savollarga batafsil javob berildi.

Davlat test markazi matbuot xizmati