2022-yil 24-fevral kuni Davlat test markazida navbatdagi “Ochiq eshiklar kuni” tashkil etildi. Unda 100-son tayanch harakatida nuqsoni bor bo‘lgan bolalar uchun maxsus maktab internati, 101, 102-, va 106-son kar va zaif eshituvchi bolalar uchun maxsus maktab internatlar hamda “Mehrli qo‘llar” imkoniyati cheklangan yoshlar va bolalar markazi bitiruvchilari, shuningdek, ommaviy axborot vositalari vakillari ishtirok etdilar.

Tadbir Davlat test markazi direktori o‘rinbosari Radjabov Sardor Baxtiyorovichning kirish so‘zi bilan ochildi va ishtirokchilarga tadbir dasturi tanishtirildi.

Tadbirning avvalida ta’lim muassasalariga kirish test sinovlariga oid eng so‘nggi yangiliklar, kutilayotgan o‘zgarishlar, test sinovi jarayonlarini soddalashtirish, test topshiruvchilar uchun yanada kengroq imkoniyat, qulayliklarga asoslangan shart-sharoitlar yaratish, mantiqiy fikrlashga yo‘naltirilgan test topshiriqlaridan kengroq foydalanish, umumta’lim fanlaridan milliy test tizimi, shuningdek, Davlat test markazining hududlarda qurilishi rejalashtirilayotgan binolari, ulardan foydalanish imkoniyatlari bo‘yicha keng ma’lumotlar berildi, videoroliklar namoyish etildi.

Dasturga ko‘ra, bitiruvchi yoshlar test sinovlariga tayyorgarlik ko‘rish, o‘tkazish va muvofiqlashtirish ishlarini amalga oshiruvchi boshqarma va bo‘lim, chet tilini bilish darajasini baholash boshqarmasi faoliyatlari bilan yaqindan tanishtirildi. Shundan so‘ng ular doimiy maxsus, yopiq rejimdagi binoda faoliyat olib boruvchi boshqarma va bo‘limlar foliyati bilan tanishish, jarayonlarni o‘z ko‘zlari bilan ko‘rish uchun taklif etildilar. “Ochiq eshiklar kuni”ga tashrif buyurganlar test topshiriqlarini shakllantirish, kitoblarni nashr etish va manzillari bo‘yicha jo‘natish, qabul qilish hamda Davlat test markaziga olib kelingan javoblar varaqalari asosida natijalarni hisoblash jarayonlarini o‘z ko‘zlari bilan ko‘rib, to‘liq tasavvurga ega bo‘ldilar.

Davlat test markazi tomonidan amalga oshirilayotgan faoliyat turlari, avtomatlashtirilgan jarayonlar ishtirokchilarda katta qiziqish uyg‘otdi. Tadbir davomida bitiruvchilar va jurnalistlarni qiziqtirgan barcha savollarga amaldagi jarayonlar orqali ko‘rsatilgan holda batafsil javob berildi.

Davlat test markazi matbuot xizmati