Bugun Davlat test markazi direktori Karimov Madjit Malikovich muassasada faoliyat olib borayotgan yoshlar bilan uchrashdi. Ochiq suhbatga asoslangan uchrashuv davomida yoshlar hayoti, ijtimoiy himoya, ilmiy-tadqiqot ishlarini olib borish, sport bilan shug‘ullanish kabi dolzarb masalalar ochiq-oydin tahlil qilindi.

Yig‘ilishda ta’kidlanganidek, “Yoshlarni qo‘llab-quvvatlash va aholi salomatligini mustahkamlash” yilida yoshlarimizni qo‘llash yangi pog‘onaga ko‘tarildi. Ularning oldiga qo‘yilayotgan maqsad, talab va taklif, shuningdek, barcha jabhalarda kelajakda istagi bor yoshlarni himoya qanoti ostiga olish, orzu-umidini amalga oshirishiga keng yo‘l ochish bo‘yicha davlatning aniq yo‘nalishi belgilab olangan. Prezidentimizning Yoshlar Forumida so‘zlagan nutqi, O‘zbekiston Respublikasi Oliy Majlisi deputatlari va xalqiga yo‘llagan Murojaatnomasida yoshlarga bo‘lgan e’tiborning yuksak namunalari qayd etib o‘tildi.

Ochiq muloqot jarayonida asosiy e’tibor Davlat test markazi yoshlarining faoliyatini ilmiy izlanish bilan birga olib borish holatiga qaratildi. Davlat test markazida bu masalada yoshlar uchun barcha zarur shart-sharoit yaratilganligi, muassasada yoshlar qariyb 40 foizni tashkil qilsa-da, ularning barchasi ilmiy-tadqiqot ishlari bilan qamrab olinganligi, pandemiya sharoiti davrida tegishli mahalliy va xorijiy muassasalar, mutaxassislar bilan yaqindan aloqa o‘rnatilganligi, Zoom platformasi yordamida xorijiy hamkorlar bilan ish olib borilayotganligi va bular keyingi yillarda katta samara berayotganligi ta’kidlab o‘tildi. Shuning barobarida oxirgi uch yilda 4 nafar yoshlar ilmiy-tadqiqot ishlarini tugatib, muvaffaqiyatli himoya qilgani eslatib o‘tildi.

Shular bilan bir qatorda, M.Karimov o‘z so‘zida, har qanday vaqt tig‘izligiga qaramay, yoshlarni ilmiy ish bilan shug‘ullanishda vaqt va chegara bo‘lmasligini ilmiy asosda tushuntirib, yoshlarda hozirdan hayot strategiyasi bo‘lishi va unga mudom amal qilishi, shaxsda 40 yoshga kirgunga qadar qiziqish, ijodkorlik, fantaziya yuqori darajada bo‘lishi, ayniqsa ana shu yoshda ilmiy qo‘rg‘onini mustahkamlashda foydalanib qolishga chaqirdi.

O‘z navbatida, Davlat test markazi rahbariyati yoshlarni muntazam ijtimoiy himoya qilish, sport bilan shug‘ullanish uchun yaratilgan imkoniyatlarni yanada kengaytirish, shart-sharoitlarni  yanada yaxshilash, ayniqsa, ilmiy ishlar bilan shug‘ullanishni muvaffaqiyatli davom ettirish, uni yangi yuqori bosqichga ko‘tarish bo‘yicha har qanday ko‘makka tayyor ekanligini bildirdi.

Qizg‘in musohaba tarzida o‘tgan ochiq muloqot paytida yoshlarning barcha savollariga batafsil javob berib borildi va taklif, fikr-mulohazalari tegishli boshqarmalar tomonidan o‘rganib chiqilishi belgilandi. Shuningdek, yoshlar bilan rahbarning bunday uchrashuvlari endilikda har oyda uyushtirilishiga kelishib olindi.

Davlat test markazi matbuot xizmati