2019-yil 23-dekabr kuni Davlat test markazida tasarrufida oliy harbiy ta’lim muassasalari bo‘lgan vazirlik va idoralar vakillari ishtirokida yig‘ilish bo‘lib o‘tdi.

Yig‘ilish davomida oliy harbiy va davlat oliy ta’lim muassasalariga o‘qishga kirishga tayyorgarlik ko‘rayotgan abituriyentlarga teng imkoniyatlar yaratish, shuningdek, ulardagi test sinovi topshiriladigan fanlar majmuasini maqbullashtirish masalalari muhokama qilindi.

Unda Vazirlar Mahkamasining 2014-yil 3-iyundagi 141-son qarori bilan tasdiqlangan “O‘zbekiston Respublikasi oliy harbiy ta’lim muassasalariga tanlash tartibi va qabul qilish qoidalari to‘g‘risidagi nizom”ga tegishli o‘zgartirish va qo‘shimchalar kiritish, test sinovi topshiriladigan fanlar majmuasini davlat oliy ta’lim muassasalaridagi tartiblarga muvofiqlashtirish maqsadga muvofiq deb topildi.

Shu munosabat bilan, mazkur masalalar bo‘yicha takliflar ishlab chiqish, umumlashtirish, mas’ul mutaxassislar ishtirokida qayta ko‘rib chiqish belgilandi.

Davlat test markazi matbuot xizmati