Vazirlar Mahkamasining “O‘zbekiston Respublikasi oliy harbiy ta'lim muassasalariga tanlash tartibi va qabul qilish qoidalari to‘g‘risidagi nizomni tasdiqlash haqida” 2014 yil 3 iyundagi 141-son qaroriga asosan joriy yil 5 iyul kuni Respublikadagi Mudofaa vazirligi, Davlat xavfsizlik xizmati, Milliy gvardiya, Favqulodda vaziyatlar vazirligi va Davlat bojxona qo‘mitasi tasarrufidagi 7 ta oliy harbiy ta'lim muassasalariga qabul test sinovlari bo‘lib o‘tdi.

Test sinovlari 2 smenada, videokuzatuv vositalari bilan jihozlangan katta sig‘imli binolarda shaffofligi, adolatliligi ta'minlangan holda o‘tkazildi. Ota-onalarning kutish joylarida va jamoatchilik uchun jarayonlarni https://test2019.uz/ sayti orqali onlayn kuzatib borish imkoniyati yaratildi.

Test sinovlarida ishtirok etishi belgilangan 6008 nafar abiturientdan 5932 nafari ishtirok etdi, 76 nafari qatnashmadi, test topshirish tartib-qoidalarini buzganligi sababli, 33 nafar abiturient test sinovlaridan chetlatildi.

Test materiallari barcha hududlardan o‘z vaqtida Davlat test markaziga yetkazib kelindi.

Ayni paytda yopiq va maxfiy rejimda natijalarni hisoblash ishlari olib borilmoqda.

Axborot xizmati