2020-yil 7-avgust kuni soat 16:00 da Axborot va ommaviy kommunikatsiyalar agentligi binosida matbuot anjumani o‘tkazildi.

Matbuot anjumani Prezident Shavkat Mirziyoyev rahbarligida 6-avgust kuni bo‘lib o‘tgan joriy yilda oliy ta’lim muassasalariga qabulni tashkil qilish va 2020-2021-o‘quv yiliga tayyorgarlik ko‘rish masalalari bo‘yicha yig‘ilishda belgilangan vazifalarga bag‘ishlandi.

Unda Oliy va o‘rta maxsus ta’lim vazirligi, Jismoniy tarbiya va sport vazirligi hamda Davlat test markazi vakillari ishtirok etdi.

Matbuot anjumanida joriy yilda oliy ta’lim muassasalarining bakalavriat ta’lim yo‘nalishlariga abituriyentlar qabulini tashkil qilish va 2020-2021-o‘quv yiliga tayyorgarlik ko‘rish masalalari bo‘yicha batafsil ma’lumotlar berildi.

Jumladan, test sinovlari Toshkent va Nukus shaharlari hamda viloyatlar markazlaridagi stadionlarda tashkil etiladi.

Jarayonlar videokuzatuv ostida onlayn translatsiya qilinib, shaffoflik ta’minlangan holda o‘tkazilaladi. Shuningdek, abituriyentlarni kiritishda va shaxsini aniqlashda shaxsni identifikatsiyalash vositalari (videofiksatsiya, barmoq izi skaneri) dan foydalaniladi.

Test sinovlari 2-sentabrdan boshlanadi va kuniga 2 marta (havo salqin paytda) o‘tkazilib, 14 kunda yakunlanadi.

Abiturientning test sinovida to‘plagan ballari haqidagi ma’lumot test sinovi o‘tkazilgan kunning ertasiga, uning talabalikka tavsiya etilgani yoki etilmagani bo‘yicha belgilangan tartibda tasdiqlangan tanlov natijasi test sinovlarini o‘tkazish jarayoni to‘liq yakunlangandan keyin bir hafta muddat ichida Davlat test markazining rasmiy veb-saytida e’lon qilinadi.

Matbuot anjumani yakunida OAV vakillarining savollariga batafsil javob berildi.

Davlat test markazi matbuot xizmati