O‘tayotgan o‘quv yilida davlat oliy ta’lim muassasalarining bakalavriat ta’lim yo‘nalishlariga qabul test sinovlari jarayonlari, ko‘pchilik e’tirof etganidek, ancha shaffof, oshkora va adolatli o‘tdi. Bu eng avvalo hukumat rahbariyatining ushbu sohada olib borayotgan siyosati, islohotlari mahsulidir. Shu bilan birga, jarayonlar yakuni bo‘yicha jamoatchilikka aniq ma’lumotlar berib borish, ularni qiziqtirgan tomonlaridan xabardor qilib borish ham davr talabidir. Oshkoralikda uni to‘g‘ri hazm qilish, ya’ni to‘g‘ri tushunish, to‘g‘ri statistik tahlil qilish, to‘g‘ri taqqoslay olish juda muhim. Biroq hammadan ham, hamma joyda ham bunday bo‘lishini kutish noo‘rin.

Joriy yilda davlat oliy ta’lim muassasalarining bakalavriat ta’lim yo‘nalishlariga qabul uchun o‘tkazilgan test sinovlari yakuniga doir Davlat test markazi tomonidan ayrim hisobotlar e’lon qilindi. Bunday oshkoralik ayrimlar tomonidan aks tushuncha bilan kutib olindi. Ular asosan abituriyentlardan yig‘ilgan mablag‘larning nimalar uchun sarf qilinganligiga nisbatan e’tiroz bildirganligini ko‘rish mumkin. Aniqrog‘i, guruh nazoratchilariga to‘langan ish haqi, ularning tushligi uchun sarflangan xarajatlar, moddiy-texnika bazasi uchun ketgan sarf-xarajatlar ularga tushunarsiz bo‘libdi. Axir, bularning hammasi yurtboshimiz tomonidan imzolangan qarorlarda o‘z aksini topganku?!

Tabiiy savol tug‘iladi. Hisobotning keng omma uchun e’lon qilinishi oshkoralik emasmi? Ba’zilar qay bir tartibga ko‘nishlari noma’lum – na sovuqqa va na issiqqa. Natijalarni test sinovi o‘tkazilgan kunning ertasiga chiqarish uchun qanday imkoniyatga ega texnikalar talab qilinishini, bunday eng zamonaviy texnika vositalarining yillik resurslari Davlat test markazida bir oydayoq tugashini, umuman, natijalarni avvalgi yillardagi kabi 15-18 kunda chiqarish qaydayu, bir kunda chiqarish qayda, ular bilisharmikin? Yoki guruh nazoratchilari ertalab soat 05:00 dan kechqurun soat 18:00 gacha tik oyoqda turib, adolatlilikni ta’minlash bilan band bo‘lishlarini, shuningdek, oldingi yillarda respublika bo‘yicha 24 mingdan ortiq auditoriyada test sinovi o‘tkazishda shaffoflik, adolatni ta’minlab bo‘ladimi, yaxshi shart-sharoit nimaligini tushunishadimi? Nima uchun ba’zilarimiz “chiqimlar faqat davlat cho‘ntagidan bo‘lishi kerak”, deb hisoblaymiz? Davlatimiz shunday ham yoshlarning oliy ta’lim olishlari yo‘lida behisob imtiyoz va imkoniyatlar yaratish bilan shug‘ullanayapti. Bularni ko‘ra olamizmi? Qo‘lni ko‘ksimizga qo‘yib, faxr bilan “rahmat” ayta olamizmi?

Istak faqat yomonlikni ko‘rish emas, balki yaxshilikni baholay olish, tahlil qila olish, bitta sohaga oid oldingi va keyingi voqea-hodisalarni taqqoslay olish qobiliyati bilan hamohanglikdadir.

Xulosa o‘rnida aytish kerak – Siz ta’lim sohasiga oid olib borilayotgan dolzarb islohotlarni tushunmas ekansiz, foyda keltira olmas ekansiz, yaxshisi, zarar ham keltirmang, aralashmang. Yoshlarimiz kelajagini belgilovchi ushbu islohotlarni amalga oshirish uchun jonini fido qilguvchi vatanparvarlar juda ko‘p.

Davlat test markazi matbuot xizmati