Ekonomikalıq rawajlandırıw hám kámbaǵallıqtı qısqartıw ministrligi tárepinen Normativ-huqıqıy hújjetler joybarların talqılaw portalına “2022-2023-oqıw jılında Ózbekstan Respublikasınıń joqarı oqıw orınlarına qabıl qılıwdıń mámleketlik buyırtpası parametrleri haqqında»ǵı qarar joybarı járiyalandı.

Qarar joybarında Ózbekstanda birinshi márte aralıqtan oqıtıw tálim forması ushın mámleketlik buyırtpası parametrlerin ajıratıw kózde tutılǵan.

Oǵan bola, 2022-2023-oqıw jılı ushın mámleketlik buyrtpası parametrleri:

a) bakalavrlar tayarlaw boyınsha:

• kúndizgi tálim formasına – 76 728 orın;
• sırtqı tálim formasına – 27 365 orın;
• keshki tálim formasına – 2 575 orın;
• aralıqtan oqıtıw tálim formasına – 3 610 orın;

b) magistrlar tayarlaw boyınsha– 11 082 orın;

v) shet el oqıw orınları hám olardıń filialları hám de mámleketlik emes joqarı bilimlendiriw mákemelerinde mámleketlik grant tiykarında kadrlar tayarlaw boyınsha– 100 orın etip tastıyıqlaw usınıs etilmekte.

Sonday-aq, qarar joybarında 2023-2024-oqıw jılınan baslap:

• barlıq mámleketlik oqıw orınlarına mámleketlik buyırtpası parametrlerin tek ǵana mámleketlik grant tiykarında tastıyıqlaw;
• tólemli-shártnama tiykarında qabıllaw kvotaların bolsa joqarı oqıw orınları, finanslıq hám akademiyalıq erkinlik berilgen joqarı oqıw orınlarınıń Baqlaw keńesleri, boysınıwına qarap tiyisli ministrlik hám shólkemler, Ekonomikalıq rawajlandırıw hám kámbaǵallıqtı qısqartıw hám de Joqarı hám orta arnawlı bilimlendiriw ministriligi menen kelisilgen halda erkin tastıyıqlaw usınıs etilmekte.