Davlat test markazi va “Oxford University Press” vakillari o‘rtasida uchrashuv bo‘lib o‘tdi.

Uchrashuvda “Oxford University Press” tomonidan “EDU Press” ixtisoslashtirilgan kitob do‘koni direktori, rasmiy distributor Mirlan Ashimkanov hamda Markaziy Osiyo va Yaqin Sharqda mintaqaviy rivojlanish bo‘yicha menejer Asel Baybatirova ishtirok etdi.

Davlat test markazi tomonidan direktori o‘rinbosari K.Xakberdiyev, Chet tilini bilish va egallash darajasini baholash boshqarmasi boshlig‘i S.Radjabov, Chet tilini bilish darajasining pedagogik o‘lchovlarini rivojlantirish bo‘limi boshlig‘i E.Urayeva, bo‘lim bosh mutaxassisi A.Aladina qatnashdi.

K.Xakberdiyev Davlat test markazi faoliyati to‘g‘risida qisqacha to‘xtalib, Davlat test markazi tomonidan o‘tkazilgan testlar, test sinovlaridagi yangiliklar, jarayonning sifati, shaffofligi va obyektivligini oshirish maqsadida O‘zbekiston Respublikasi Prezidenti tashabbusi bilan amalga oshirilgan test sinovlaridagi o‘zgarishlar haqida so‘zlab berdi.

S.Radjabov Chet tilini bilish va egallash darajasini baholash boshqarmasi faoliyati, chet tilini bilish darajasini baholovchi Milliy test tizimi haqida gapirib, Oksford universiteti bilan hamkorlikning mumkin bo‘lgan yo‘nalishlariga to‘xtaldi.

Asel Baybatirovaninig so‘zlariga ko‘ra, “Oxford University Press” 15 dan ortiq mamlakatlarda akkreditatsiyadan o‘tgan sinov markazlariga ega va O‘zbekiston davlat jahon tillari universiteti, O‘zbeksitondagi Yodju texnika instituti kabi 100 ga yaqin ta’lim muassasalari bilan hamkorlik qiladi.

Uchrashuvda boshqarma xodimlarining malakasini oshirish borasida hamkorlik rejalari, shuningdek, Davlat test markazida test sinovlarini o‘tkazish imkoniyatlari muhokama qilindi.

Davlat test markazi matbuot xizmati