2020 yil 12 mart kuni Davlat test markazida O‘zbekiston Respublikasi Prezidentining 2020 yil 27 fevraldagi “Pedagogik ta’lim sohasini yanada rivojlantirish chora-tadbirlari to‘g‘risida”gi PQ-4623-son qarorida pedagogika ta’limi sohasining bakalavriat ta’lim yo‘nalishlariga o‘qishga qabul jarayonida abituriyentlarning pedagoglik kasbiga layoqati darajasini aniqlash bo‘yicha belgilangan topshiriqlar ijrosini ta’minlashga bag‘ishlangan yig‘ilish bo‘lib o‘tdi.

Tadbirda Xalq ta’limi vazirligi, Maktabgacha ta’lim vazirligi, Davlat test markazi hamda Toshkent davlat pedagogika universiteti mutaxassislari ishtirok etdilar.

Tegishli bakalavriat ta’lim yo‘nalishlari bo‘yicha abituriyentlarni qabul qilishda ularning yozish ko‘nikmalari, intellektual salohiyati, psixologik barqarorligi va pedagoglik kasbiga moyilligi darajasini aniqlash mexanizmlari yuzasidan mutaxassislarning takliflari muhokama etildi.

Yig‘ilish yakunida mazkur masalani davriy ravishda muhokama etib borishga kelishib olindi.

Davlat test markazi matbuot xizmati