Ma'lumki, O‘zbekiston Respublikasi Prezidentining “Respublika oliy ta’lim muassasalariga talabalikka qabul qilingan iqtidorli yoshlarni yanada qo‘llab-quvvatlash chora-tadbirlari to‘grisida” 2021-yil 6-iyuldagi PQ-5172-son qaroriga muvofiq O‘zbekiston Respublikasidagi davlat oliy ta’lim muassasalari bakalavriatining kunduzgi ta’lim shakliga kirish imtihonlarida eng yuqori ball to‘plagan 200 nafar talaba orasidan Prezident granti sovrindorlarini aniqlash belgilangan.

Joriy yil 17-yanvar kuni Bilimni baholash agentligi tomonidan Prezident granti sovrindorlarini aniqlash bo‘yicha o‘tkazilgan test sinovlarida 2023–2024-o‘quv yilida  davlat oliy ta’lim muassasalari bakalavriatining kunduzgi ta’lim shakliga kirish imtihonlarida eng yuqori ball to‘plagan 33 nafar talaba ishtirok etdi.

Talabgorlar uchun xorijiy til va O‘zbekiston tarixi fanlari bo‘yicha imtihon o‘tkazildi. Test sinovlarida har bir fan bo‘yicha 50 tadan savol berilishi belgilangan bo‘lib, har bir to‘g‘ri javob 2 ball bilan baholanadi. Bunda to‘plash mumkin bo‘lgan maksimal ball 200 ballni tashkil etadi.

Test sinovi natijalari Oliy ta'lim, fan va innovatsiyalar vazirligiga taqdim etiladi.